بنٹوال میں کرونا وائرس کے خوف سے ایک شخص نے کی خودکشی
بنٹوال،27/مارچ (ایس او نیوز) بنٹوال میں ایک شخص نے صرف اس شک کی وجہ سے خود کشی کرلی کہ شاید اسے کروناوائرس کی بیماری لاحق ہوگئی ہے۔ مہلوک شخص کا نام سدا شیوا شیٹی (56سال) بتایا گیا ہے۔
ذرائع سے ملی اطلاع کے مطابق سداشیوا بنٹوال کے ابیٹو نامی علاقے کا رہنے والا تھا۔ وہ ایک پٹرول بنک میں ملازم تھا۔ ملک میں کورونا وائرس کی وباء عام ہونے اور ساحلی علاقے میں متاثرہ اور مشتبہ افراد کے معاملات سامنے آنے کے بعد و ہ ذہنی طور پر بہت پریشان ہوگیا تھا۔ اس کے دماغ میں یہ بات بیٹھ گئی تھی کہ گاڑیوں میں پٹرول بھرنے کے دوران شاید وہ کسی مریض کے رابطے میں آگیا ہے اور اس پر بھی کورونا وائرس کا اثر ہوگیا ہوگا۔اور اگر ایسا ہوا تو پھر یہ بیماری اس کے گھر والوں میں بھی منتقل ہوجائے گی۔
اس خدشے نے سد اشیوا شیٹی کو اس حد تک پریشان کیا کہ اُس نے اپنے گھر میں ہی سیلنگ فین سے پھانسی لگا کر خودکشی کرلی۔بنٹوال مضافاتی پولیس اسٹیشن میں مہلوک کی بیوی کی طرف سے شکایت ملنے پر کیس درج کرلیا گیا ہے۔
