بنٹوال : سرکاری اسکول میں گنپتی پوجا - بی ای او کی طرف سے تحقیقات - اسکول ڈیولپمنٹ کمیٹی صدر مستعفی ۔ گاوں والے ناراض
بنٹوال،27؍ مئی (ایس او نیوز) بنٹوال تعلقہ کے پڈی باگیلو نامی گاوں میں سرکاری اسکول دوبارہ کھلنے پر 'گنپتی ہاونا' انجام دی گئی جس پر بلاک ایجوکیشن آفیسر نے اسکول ڈیولپمنٹ کمیٹی صدر سے پوچھ تاچھ کی اور ڈی ڈی پی آئی کو رپورٹ بھیج دی ۔ اس کے جواب میں ایس ڈی سی صدر بال کرشنا کارنتھ نے اپنا استعفیٰ دے دیا جس کے بعد گاوں والے محکمہ تعلیمات کے افسر سے ناراض ہوگئے ہیں۔
معلوم ہوا ہے کہ گزشتہ 25 سال سے یہاں چھٹیوں کے بعد اسکول دوبارہ کھلنے کے پہلے دن گنپتی پوجا یا ہاونا کی رسم ادا کی جاتی ہے ۔ اس مرتبہ محکمہ تعلیمات کو اس تعلق سے ایک شکایت موصول ہوئی جس کے بعد بلاک ایجوکیشن آفیسر نے کارروائی کی ۔ جس پر اسکول ڈیولپمنٹ کمیٹی اور بچوں کے والدین نے سخت اعتراض جتایا ہے۔
گاوں والوں کا کہنا ہے کہ ہم لوگ تمام طبقات والے مل جل کر رہتے ہیں ۔ یہ رسم یہاں پر برسہا برس سے چلی آ رہی ہے ۔ اب تک کسی نے بھی اس پر اعتراض نہیں جتایا تھا ۔ اس کے علاوہ ہر جمعرات کو یہاں بھجن بھی کیا جاتا ہے ۔ تمام طلبہ اس میں شرکت کرتے ہیں۔
جنوبی کینرا کے ڈی ڈی پی آئی سدھاکر نے اس معاملہ پر اپنا موقف ظاہر کرتے ہوئے کہا :" ہمیں ریاستی حکومت اور عدالت کے فصیلے پر عمل کرنا ہے ۔ اسکولوں میں مساوات ہونی چاہیے اور وہاں کسی بھی قسم کا مذہبی رنگ نہیں ہونا چاہیے ۔ بنٹوال بی ای او نے بتایا ہے کہ انہوں نے اس معاملہ پر وضاحت طلب کی ہے۔"