بنٹوال : الیکٹرانکس شو روم میں بھڑکی آگ
بنٹوال،2 ؍ فروری (ایس او نیوز) آج صبح شہر کے بی سی روڈ پر واقع پریا الیکٹرانکس شو روم میں اچانک آگ بھڑک اٹھی جس کی وجہ سے شو روم میں موجود کافی سامان جل گیا ہے ۔ ابھی نقصانات کی تفصیل معلوم نہیں ہوئی ہے۔
ذرائع سے ملی اطلاع کے مطابق آگ شو روم کے سب سے اوپری منزلہ پر لگی تھی ۔ اس شو روم میں الیکٹرانک سامان کے علاوہ الیکٹرک اسکوٹرس کا بھی اسٹاک موجود تھا ۔ اس لئے سمجھا جاتا ہے کہ شاید اسکوٹر کی بیٹری میں دھماکہ ہونے کے بعد وہاں آگ لگی ہوگی۔
علاقے میں موجود لوگوں نے جب شو روم سے دھواں اٹھتے دیکھا تو فائر سروس عملہ کو اس کی اطلاع دی ۔ مقامی لوگوں کی مدد سے فائر بریگیڈ والوں نے آگ بجھائی۔ بنٹوال سٹی سب انسپکٹر رام کرشنا اور دیگر عملہ نے جائے وقوع پر پہنچ کر معائنہ کیا۔