بنٹوال میں گھر کے اندر پائی گئیں باپ اور بیٹی کی لاشیں۔پولیس کو ہے خودکشی کا شبہ
بنٹوال 24؍مارچ (ایس او نیوز) بی سی روڈ پر ایک کرایے کے مکان میں مقیم باپ اور بیٹی کی لاشیں مشکوک حالت میں دستیاب ہوئی ہیں، جس کے بارے میں پولیس کو شک ہے کہ شاید دونوں نے خودکشی کی ہے۔
موصولہ رپورٹ کے مطابق بی سی روڈ کے ویویکا نگر کے گھر میں ملی ان لاشوں کی شناخت پربھا کر(45سال) اور پرمانیا (12سال) کے طور پر کی گئی ہے۔ بتایاجاتا ہے کہ پربھاکر پہلے خلیجی ملک میں ملازمت کرتاتھا۔ ابھی پچھلے تین برسوں سے وہ بی سی روڈ کے کرایے کے مکان میں رہائش پزیر تھا اور اس کی بیٹی پرمانیا ایس وی ایس انگلش میڈیم اسکول میں چوتھی جماعت کی بہت ہی ذہین طالبہ تھی۔پربھاکر فنانسنگ کا کاروبار کررہاتھا۔کہاجاتا ہے کہ جمعہ اور سنیچر دو دن سے پرمانیا اپنے اسکول سے غیر حاضر تھی۔گمان یہ ہے کہ جمعہ کی رات میں زہر خورانی کے ساتھ خودکشی کا یہ معاملہ کیا گیا ہے۔
پولیس کو شبہ ہے کہ پربھاکر نے پہلے اپنی بیٹی کو زہرکھلانے کے بعد خود بھی زہر کھالیا ہوگا اور اس طرح دونوں نے خود کشی کرلی ہوگی۔بنٹوال ٹاؤن پولیس اسٹیشن کے افسران نے جائے واردات پر پہنچ کر معائنہ کیا۔ اڈپی ضلع ایس پی لکشمی پرساد نے بھی موقع پر پہنچ کر معائنہ کیا اور تحقیقات کے سلسلے میں پولیس افسران کی رہنمائی کی۔دونوں لاشوں کو پوسٹ مارٹم کے لئے اسپتال میں بھیج دیاگیا ہے۔