بنٹوال 4/اکتوبر(ایس او نیوز) اپنے آپ کو ایک پرائیویٹ ٹی وی چینل کا کیمرہ مین بتاکرمقامی تعلیمی ادارے کو بلیک میل کرنے اور اس سے 50ہزار روپے کاچیک وصول کرنے کے الزام میں بنٹوال پولیس نے نقلی صحافی کو گرفتار کرلیا ہے۔

بتایاجاتا ہے کہ اشوک نامی اس جعلی صحافی نے مقامی تعلیمی ادارے سے رابطہ قائم کیا اور اس ادارے کے تعلق سے منفی رپورٹنگ کرنے کی دھمکی دی۔ اس کے بعد اپنا منھ بند رکھنے کے لئے اس نے 50ہزار روپے طلب کیے۔ اس کے دباؤ میں آکر تعلیمی اداے نے 50ہزار روپوں کا چیک تودیدیا لیکن انہیں کچھ شک ہوا تو انہوں نے منگلورو میں موجود متعلقہ ٹی وی چینل کے نمائندوں سے بات کی تو معلوم ہوا کہ اشوک نامی اس جعلی صحافی کا اس چینل سے کچھ لینا دینا نہیں ہے۔

پھراس کے بعد تعلیمی ادارے کے ذمہ داروں نے جب اشوک سے فون پر رابطہ کیا تو اس نے اپنے جرم کا اقرار کیا اور چیک واپس لوٹاتے ہوئے تعلیمی ادارے سے درخواست کی کہ اس کے خلاف کوئی شکایت درج نہ کی جائے۔ لیکن چیک واپس ملنے کے بعد تعلیمی ادارے کے ذمہ داروں نے تمام تفصیلات پولیس کو بتادیں، جس کے بعد ٹاؤن پولیس اسٹیشن میں کیس درج کر کے اشوک کو حراست میں لیا گیا۔ پولیس مزید تحقیقات میں لگی ہوئی ہے۔