بنٹوال 23/اکتوبر (ایس او نیوز) فرنگی پیٹ کے قریب ایک بے قابو کار مسجد کے اندر گھس آئی جس کی وجہ سے کار میں موجود 4افرادسمیت وضو خانے کے قریب موجود 2افراد زخمی ہوگئے او ر یہ سارا منظر سی سی کیمرے میں قید ہوگیا۔
کار میں سفر کررہے پتور کے رہنے والے مونپّا، سوشیلا، نرملا اور رگھو رام زخمی ہوگئے جبکہ مسجد کے احاطے میں موجود اسماعیل اور سلیمان کو بھی چوٹیں آئی ہیں۔اسماعیل او رسلیمان کو علاج کے لئے تومبے اسپتال میں داخل کیا گیا ہے۔عینی شاہدین کا کہنا ہے کہ کار کے مسافرین کو بس معمولی چوٹیں آئی ہیں۔
معلوم ہوا ہے کہ حادثے کا شکار ہونے والی کار پتور سے منگلورو کی طرف جارہی تھی اور جب منگلورو بنگلورو نیشنل ہائی وے پرفرنگی پیٹ کے علاقے سے گزر رہی تھی تو وہ اچانک بے قابو ہوگئی۔کار مسجد کے احاطے کی دیوار سے اس تیز رفتاری کے ساتھ ٹکرائی تھی کہ اگلی دیوار توڑنے کے بعد وہ دوسری طرف والی دیوار سے ٹکراکر رک گئی تھی۔کار کا اگلا حصہ بری طرح تباہ ہوگیا ہے۔ حادثے کی خبر ملنے پر بنٹوال پولیس کے افسران نے جائے وقوع پر پہنچ کر معائنہ کیا اور کیس درج کرلیا ہے۔