بنٹوال میں پولس کے بھیس میں بزرگ شخص کے قیمتی زیورات لوٹنے کی واردات
منگلورو:20؍جنوری(ایس اؤ نیوز)دو مکاروں نے پولس کے بھیس میں بی سی روڈ بنٹوال کے ایک بزرگ باشندے سے ایک لاکھ روپئے مالیت کے سونے کے زیورات لوٹ کر فرار ہوگئے، جس کے تعلق سے بنٹوال پولس تھانہ میں معاملہ درج کیا گیا ہے۔
ذرائع سے ملی اطلاع کے مطابق جعلسازوں کا شکار ہوئے موظف بینک آفیسر شیوپرساد شرماسنیچر کو 12بجے دوپہر میں اپنے بال کٹوانے ہئیر سلون جارہے تھے۔ پیدل چلنے کےدوران ایک انجان شخص بائک پر سوار ہوکر شیوپرساد کے قریب آیا اور اپنا نام اشوک بتاتے ہوئے کرائم برانچ پولس آفیسر کی حیثیت سے اپنی شناخت کرائی۔اس نقلی آفسر نے شیوپرساد کو متنبہ کرتے ہوئے بتایا کہ علاقےمیں چورگھس آئے ہیں جو اُسے لوٹ سکتے ہیں۔
اشوک کے چلے جاتے ہی ایک اور انجان شخص ان کے قریب پہنچ گیا اور پہلے والے کی طرح ہی متنبہ کیا۔ شیوپرساد نے اس سے جب شناختی کارڈ پوچھا تو حیرت انگیز طور پر اُس نے اپنا شناختی کارڈ بھی دکھایا بعد میں اُس نے ایک دستی دے کر کہا کہ اس میں جو بھی قیمتی زیورات ہیں وہ رکھ دو، تاکہ لٹیروں سے وہ محفوظ رہے۔ شیوپرساد نے اپنا موبائل سمیت زیورات دستی میں رکھ دئے اور متعلقہ نقلی پولس آفسر کے حوالے کردیا۔
کچھ ہی دیر بعد متعلقہ دستی شیوپرساد کو واپس کی گئی، مگر جب شیوپرساد نے دستی کو کھول کر دیکھا تو اس میں سوائے موبائیل کے کچھ نہیں تھا۔ اس سے پہلے شیوپرساد کچھ کہتا، لُٹیرا فرار ہوچکا تھا ۔ بنٹوال پولس تھانےمیں کیس درج کرلینےکے بعد پولس جانچ میں جٹ گئی ہے۔