مینگلور : پولیس کانسٹیبل پر ٹِپّر چڑھانے کی ناکام کوشش ۔ دو ملزمین گرفتار
مینگلور 22/ اکتوبر (ایس او نیوز) گاڑیوں کی چیکنگ کے دوران پولیس کانسٹیبل پر ٹِپّر چڑھانے کی ناکام کوشش کرکے فرار ہونے والے دو ملزمین کو منگلورو سٹی پولیس نے گرفتار کر لیا ۔
اطلاع کے مطابق ملزمین کے نام عبدالاسحاق اور محی الدین اظہر ہیں ۔ 19 اکتوبر کو کانسٹیبل شیکھر چوگلہ اور رادھا کرشنا فرنگی پیٹ آوٹ پوسٹ پر تھے ۔ بتایا جاتا ہے کہ رات 2.30 بجے کے قریب چیکنگ کے دوران منگلورو کی طرف سے آرہی ایک ٹِپّر گاڑی روکنے کی کوشش کی گئی تو مبینہ طور پر ڈرائیور نے اپنی گاڑی کانسٹیبل چوگلہ کے اوپر چڑھانے کی کوشش کی ۔ اس موقع پر حاضر دماغی دکھاتے ہوئے رادھا کرشنا نے بڑی ہی سرعت کے ساتھ اسے کھینچ کر گاڑی کی زد میں آنے سے بچا لیا ۔ ٹپر ڈرائیور گاڑی بیریکیڈس سے ٹکرانے کے بعد رُکے بغیر اپنے ساتھ بیٹھے ہوئے شخص کو لے کر وہاں سے فرار ہوگیا ۔ اس کے پیچھے جو آلٹو کار آرہی تھی وہ بھی رکے بغیر فرار ہوگئی ۔ اس ضمن میں بنٹوال پولیس اسٹیشن میں دیگر دفعات کے علاوہ دفعہ 307 یعنی اقدام قتل کے تحت ملزموں کے خلاف کیس رجسٹر کیا گیا تھا۔
