بنگلورو7؍مئی (ایس او نیوز)  وزیر داخلہ رام لنگا ریڈی نے سنگین الزام لگاتے ہوئے کہا ہے کہ ریاست میں سنگھ پریوار کی طرف سے 11مسلم اور10ہندوؤں کا قتل کیا گیا ہے۔

پریس کلب میں وزیرا علیٰ کے ساتھ منعقدہ پریس کانفرنس سے قبل بولتے ہوئے وزیر داخلہ نے کہاکہ ریاست میں ہوئی قتل کی وارداتوں کے سلسلے میں بی جے پی کے لیڈر جھوٹا پروپگنڈہ کررہے ہیں۔ ذاتی معاملات میں ہونے والی قتل کی وارداتوں کو بھی ہندوؤں کا قتل بتایا جارہا ہے۔لیکن فرقہ وارانہ فسادات کے پس منظر میں سنگھ پریوار کی طرف سے انجام دی گئی قتل کی وارداتیں اس سے زیادہ ہیں۔

رام لنگا ریڈی نے کہا کہ’’ پی ایف آئی کی طرف سے تقریباً24ہندوؤں کو قتل کیے جانے کا پروپگنڈہ بی جے پی لیڈروں کی طرف سے کیا جارہا ہے۔ لیکن اگر اصل حقیقت دیکھیں تو پی ایف آئی اور دیگر مسلم شرپسندوں کی طرف سے 12افراد کو قتل کیاگیا ہے تو آر ایس ایس کی طرف سے 21افراد کا قتل کیاگیا ہے۔ اس طرح جھوٹی باتیں پھیلاکر بی جے پی کے لیڈر ساحلی علاقے میں ووٹ حاصل کرنے کی کوشش میں لگے ہوئے ہیں۔‘‘

وزیر داخلہ نے جو تفصیل بتائی اس کے مطابق آر ایس ایس کے ہاتھوں قتل ہونے والے ہندوؤں کے نام یوں ہیں: پرکاش کولائی (سورتکل)، کیشو شیٹی سورنجے (سورتکل)، ہریش پجاری (بنٹوال)، پروین پجاری (برہماور)، پرتاپ پجاری (منگلورو)، کلّپا ہنڈی باگ (پولیس آفیسر)، دھنیا شری (موڈی گیرے)، دانمّا(وجیا پور)، ایچ ایس گووندے گوڈا(بنگلورو)۔


اسی طرح آر ایس ایس کے ہاتھوں قتل ہونے والے مسلمانوں کے نام یوں ہیں: حسین سعد مودگل (ہبلی)، اسماعیل صاب (انّی گیری)، شاہ الحمید (مڈیکیری)، صفوان سومیشور(منگلورو)، مصفطیٰ (میسور) عبدالجلیل (منگلورو)، حنیف (اڈپی)، اشرف (بنٹوال)، عبدالبشیر(منگلورو)، ہوسف ماڈور (منگلورو)، مصطفیٰ ناصر (بنٹوال)۔

وزیر داخلہ کے مطابق پی ایف آئی اور دیگر مسلم شرپسندوں کے ہاتھوں قتل ہونے والے ہندوؤں کے نام یوں ہیں: پرشانت پجاری (موڈبیدری)، ڈی کے کوٹپّا(مڈیکیری)، ایم راجو (میسور)، رمیش کوٹیان (منگلورو)، پروین پجاری (خوشال نگر) چرم پجاری (منگلورو)، وشواناتھ (شیموگہ)،شرتھ کمار (بنٹوال)، سنتوش (بنگلورو)پریش میستا(ہوناور)، دیپک راؤ (سورتکل)اور رودریش (بنگلورو) ۔