بنگلورو:08؍دسمبر(ایس اؤ نیوز) مسلم متحدہ محاذ، جما عت اسلامی ہند، سدبھاؤ نا منچ بورڈ آف اسلامک ایجوکیشن کرناٹک، ایف ڈی سی اے، ایس آئی او، اے پی سی آر  اور مومنٹ فار جسٹس جیسے ہم خیال تنظیموں کی قیادت میں مسلم نمائندوں کا ایک وفد 7 / دسمبر 2019  ء  بروز سنیچر، سابق وزیر اعظم شری ایچ ڈی دیوے گوڈا سے ملاقات کرتے ہوئے ملک کے موجودہ حالات پر تبادلۂ خیال کیا۔

بات چیت کے دوران وفد نے رواں پارلیمانی اجلاس میں بحث کا موضوع بنے شہریت ترمیمی بل مسودہ کے متعلق اپنے خدشات اور تشویش کا اظہار کیا۔ وفد نے بتایاکہ شہریت بل کا مسودہ ہمارے ملک کے دستور اور سکیولر روایت کے خلاف ہے، عوام کو مذہبی تفریق کی بنیاد پر ملکی شہریت دی جاتی ہے تو وہ دراصل دستور کی دفعہ 14  اور بین الاقوامی حقوق انسانی کے معاہدوں کی خلاف ورزی ہو گی۔ وفد نے شبہ جتایا کہ متعلقہ بل کے پس پردہ سیاسی مقاصد کارفرما ہیں، اس سے فرقہ پرستی کو بڑھاوا  دینے اور مسلمانوں کو بلی کا بکرہ بنائے جانے کا خدشہ ظاہر کرتے ہوئے اس کو ایک سیاسی حربہ قرار دیا۔ متعلقہ بل کے مسودے میں کئی طرح کی خامیاں اور کمیاں موجود ہیں۔ ملک کی ابتر معاشی حالت اور عام شہریوں کو درپیش بنیادی سنگین مسائل سے توجہ ہٹانے کی کوشش کے طور پر ترمیمی بل کو پیش کئے جانےکی بات کہی۔ وہیں سابق وزیر اعظم سری دیوے گوڈا سے درخواست  کی گئی کہ وہ پارلیمنٹ میں متعلقہ بل کی سخت مخالفت کرتے ہوئے فرقہ وارانہ ہم آہنگی او ر بھائی چارگی کے ماحول کو بچائے رکھنے، انصاف اور قانون کی بالاتری کو بر قرار رکھنے، دستوری اقدار کی حفاظت کے لئے تعاون کرنے کی وفد نے گزارش کی۔ اور پارلیمنٹ کے روان اجلاس میں بل کی مخالفت میں اپنا موقف درج کرانے کے علاوہ انسانی حقوق، عدل و انصاف کی خاطر اور ملک کو بچانے کے لئے فسطائیت کا مقابلہ کرنے کے لئے ایک عوامی تحریک کی قیادت کرنے کی گزارش کی گئی۔

  اس موقع پر سابق وزیر اعظم سری دیوے گوڈا نے فسطائیت کے متعلق اپنے تجربات کو بیان کیا اور وفد کی گزارشات پر توجہ دینے کی یقین دہانی کرائی۔ وفد میں جماعت اسلامی ہند کرناٹک کے امیر حلقہ ڈاکٹر محمد سعد بلگامی، ایف ڈی سی اے کے موظف آئی پی ایس افسر فیروز پاشاہ، محمد بشارت، جمعیۃ اہل حدیث کے مولانا اعجاز احمد ندوی، BIE کے سکریٹری ریاض احمد رون، مومنٹ  فار جسٹس اور ایس آئی او کے نمائندے بھی شامل تھے۔