بنگلورو:12؍ دسمبر(ایس اؤ نیوز ) ایک شخص سڑک کے بیچوں بیچ  راستے پر گرنے کے بعد قریب تین گھنٹوں تک   اس پر  سواریاں چلتی رہیں جس کے نتیجے میں متعلقہ شخص ہلاک ہوکر اس کی حالت ناقابل شناخت ہوگئی۔ یہ اندوہناک اور دل کو دہلا دینے والی  واردات  بنگلورو ۔ میسورروڈ پر واقع جئے پورا گیٹ کے قریب ، رام نگرا شہر سے سامنے آئی ہے۔

پولس ذرائع کے  حوالے سے ٹائمز آف انڈیا میں شائع رپورٹ کے مطابق  مسلسل تین گھنٹوں تک نعش پر سواریاں چلتی رہنے سے جسم کے ٹکڑے ٹکڑے ہوگئے ۔نعش کی حالت اتنی ابتر تھی کہ اس کی شناخت تک ممکن نہیں ہو پائی۔  بالاخر پولس نے نعش کے  دائیں ہاتھ کے فنگرپرنٹس لینے کے بعد اس کو دفن کردیا۔ البتہ نعش کے دانت ، بال اوراس کی ہڈی شناخت کے مقصد سے محفوظ کرلی گئی ہے۔

 پوسٹ مارٹم کرنے والے  ڈاکٹروں سے رپورٹ لینے کے بعد   پولس نے بتایا کہ کچلی گئی نعش کی عمر 35-40کے درمیان ہے۔ رام نگر ٹرافک پولس نے بتایا کہ سڑک کی تعمیر کرنے والے ملازم نے سنیچر صبح  5بجے نعش کو بگڑی ہوئی حالت میں سڑک پر  دیکھا۔ جسم کے تمام اعضا ءمکمل طورپر کچلے  گئے تھے اور سڑک پر بکھرے ہوئے تھے سوائے  اس کے دائیں ہاتھ کے۔ ٹریفک پولس نے باقیات کو مردہ خانے میں منتقل کیا ، چونکہ نعش محفوظ کرنے کے قابل نہیں تھی ، اس لئے  ضروری کاروائیوں کے بعد سنیچر کی صبح ہی  اس کو دفن کردیا گیا۔ یہ کون شخص تھا، اس کا تعلق کہا ں  سے تھا،  کیسے سڑک پر گرگیا تھا، اس تعلق سے کوئی جانکاری نہیں مل پائی ہے۔