شکست کے لئے الیکٹرانک ووٹنگ مشینوں کو الزام دینا درست نہیں؛ رکن اسمبلی ڈاکٹر ڈی سدھاکرکا خیال
بنگلورو۔22/مئی(ایس او نیوز) رکن اسمبلی ڈاکٹر ڈی سدھاکر انتخابی ہار کے لئے بارہا الیکٹرانک ووٹنگ مشینوں پر انگلی اٹھانے پر سوالیہ نشان لگایا ہے۔
اخباری نمائندوں سے بات چیت کرتے ہوئے انہوں نے کہاکہ انتخابات میں اگر نتائج ہمارے حق میں نہیں رہے تو الیکٹرانک ووٹنگ مشینوں کو نشانہ بنانا ہر سیاسی جماعت کا وطیرہ بن گیا ہے۔ ان مشینوں کو اس لئے مورد الزام ٹھہرایا جاتاہے کہ کہیں ان سیاسی پارٹیوں کی کوتاہیاں زیر بحث نہ آجائیں۔ انہوں نے کہاکہ ایگزٹ پول کے ذریعے جو نتائج سامنے آئے ہیں وہ قطعی نہیں ہیں۔ اس بات کو ہر سیاسی پارٹی تسلیم کرتی ہے، اس کے باوجود بھی ایگزٹ پول کی بنیاد پر الیکٹرانک ووٹنگ مشینوں پر سوال اٹھانا کہاں تک جائز ہے۔
حال ہی میں وزیراعلیٰ کمار سوامی کی طرف سے ایگزٹ پول کے فوراً بعد الیکٹرانک ووٹنگ مشینوں پر سوالیہ نشان لگایا گیا۔ سدھاکر نے کہاکہ ریاست میں اگرکانگریس جے ڈی ایس اتحاد ناکام ہورہا ہے تو یہ ان دونوں پارٹیوں کی کوتاہی کا نتیجہ ہے جس پر مل بیٹھ کر غور وخوض کرنے کی ضرورت ہے۔ صرف الیکٹرانک ووٹنگ مشینوں پر الزام دھرنے کے بعد اپنا دامن جھاڑ لینا درست نہیں۔