بنگلورو،29؍دسمبر(ایس او  نیوز)السور کے میٹرو اسٹیشن سے قریب موجود میٹرو پلر کے بازو بی بی ایم پی کی جانب سے جاری برساتی نالے کے تعمیری کاموں کی وجہ سے پلر کی بنیاد کو نقصان پہنچنے کا خدشہ ہے،جس سے عوام میں ڈر وخوف کا ماحول پیدا ہو چکا ہے۔السور میٹرو اسٹیشن کے بازو موجود برساتی نالے کی ریٹرنگ وال گھس گئی ہے جس سے میٹرو پلر کی بنیاد کو نقصان پہنچنے کے خدشات ہیں۔ برساتی نالے کا مرمتی کام شروع کیا گیا ہے،مٹی کے کھسکنے سے پلر کی بنیاد کو نقصان پہنچ سکتا ہے۔ اس سلسلہ میں میٹرو کے افسروں کو اطلاع دینے پر بی ایم آر سی ایل کے مینیجنگ ڈائرکٹر انجم پرویز نے خود موقع پر پہنچ کر معائنہ کرنے کے بعد فوری حفاظتی دیوار تعمیر کرنے کے لئے افسروں کو ہدایت دی۔اس کے علاوہ السور میٹرو اسٹیشن سے اندرا نگر اسٹیشن کے درمیان میٹرو ریل کی رفتارفی گھنٹہ 35کلو میٹر سے کم کر کے25کلو میٹر کر نے کی بھی ہدایت دی گئی ہے۔ اس سلسلہ میں بی ایم آر سی ایل افسروں نے بتا یا کہ اس میٹرو پلر کو کسی طرح کوئی نقصان نہیں ہے اس سلسلہ میں انہوں نے بی بی ایم پی کی جانب سے غیر سائنٹفک طریقہ سے کام شروع کرنے پر ناراضگی کا اظہار کیا۔