بنگلورو: کورونا مریضوں کے بیڈبلاکنگ گھپلے میں بی جے پی رکن اسمبلی ستیش ریڈی کے خاص الخاص سمیت تین ملزمان کے خلاف چارج شیٹ داخل
بنگلورو:18؍جون(ایس اؤ نیوز) بیڈ بلاکنگ گھپلہ کو لے کر بومن ہلی حلقہ کے بی جے پی رکن اسمبلی ستیش ریڈی کے خاص الخاص بابو سمیت روہیت اور نیتراوتی کے خلاف سی سی بی پولس نے شہر کے ایک ویں اے سی ایم اے کورٹ میں چارج شیٹ داخل کی ہے۔
بتایا گیا ہے کہ 150صفحات پر مشتمل چارج شیٹ داخل میں ملزمان پر الزام ہے کہ وہ کورونا مریضوں کےلئے مختص اسپتالوں کے بیڈ بلاک کرکے غیرقانونی طورپر فروخت کیا کرتے تھے۔چارج شیٹ کے مطابق پولس کو اس سلسلےمیں ثبوت دستیاب ہوئے ہیں اور گوگل پے نیز فون پے کے ذریعے رقم منتقل ہوئی ہے، چارج شیٹ میں بتایا گیا ہے کہ مریضوں سے 18ہزار، 20ہزار اور 25ہزار روپئے لی گئی تھی۔
جانچ سے پتہ چلا ہےکہ جو کوئی رقم ادا کرتاتھا اس کو بابو ، وار۔ روم سے رابطہ کرتےہوئے بیڈ فراہم کیا کرتاتھا۔ مزید ایک معاملےمیں چند اسپتالوں کے متعلق 8افراد کے خلاف جانچ جاری ہے۔
یاد رہے کہ بیڈ بلاکنگ معاملے کو عوامی سطح پر لانے کے دوران رکن پارلیمان تیجسوی سوریا ، وار ۔روم پہنچ کر وہاں کام کرنےو الے عملے میں سے مخصوص طبقے سے تعلق رکھنے والے افراد کا ہی نام پیش کیا تھا اور معاملے کو لے کر فرقہ وارانہ رنگ دینےکی کوشش پر عوامی سطح پر کافی کڑی تنقید کی گئی تھی۔ لیکن حیرت انگیز طور پر پانسہ اُلٹا پڑ گیا اور پولس کی جانچ میں بی جے پی کے کارکنان ہی بیڈ بلاکنگ دھندےمیں ملوث ہونے کی بات سامنے آئی۔