بندیل کھنڈ: پہلے سوکھا اور اب بے موسم کی بارش سے پریشان کسان کررہے ہیں خودکشی
اتر پردیش،15/اکتوبر(آئی این ایس انڈیا) پہلے سوکھا اور اب زیادہ بارش کی وجہ سے بندیل کھنڈ کے کسان خودکشی کر رہے ہیں۔کئی سال سے بندیل کھنڈ میں پڑ رہے سوکھے کی وجہ سے کسان خودکشی کر رہے تھے، لیکن اس سال بے موسم بارش کی وجہ سے بندیل کھنڈ میں خریف کی فصل برباد ہوگئی۔جس سے کسانوں میں زبردست مایوسی ہے۔اوپر سے بینک کے ایک کے بعد ایک قرض وصولی کی نوٹس سے پریشان کسان خودکشی کر رہے ہیں۔ایک ہفتہ پہلے للت پور اور جالون ضلع کے دو کسانوں نے خود کشی کی۔ اب 14 اکتوبر کو قرض میں ڈوبے کسان نے خود کشی کی ہے۔ بھاکیو (بھانو) کے رہنما شیونارائن سنگھ نے بتایا کہ للت پور کے کسان رتن سنگھ اپنے کھیتوں پر گیا تھا اور جب شام کو گھر لوٹا تو اس نے اپنی بیوی سے کہا کہ شدید بارش ہونے سے پوری فصل تباہ ہو گئی ہے۔اب قرض کس طرح ادا کریں گے جب گھر والے رات کو سو گئے تھے، تب کسان زہریلی ادویات پیلی اور جب چیخ پکار کی آواز آئی تو فوری طور پر گھر والے ضلع اسپتال للت پور لے گئے۔یہاں ڈاکٹروں نے حالت خراب دیکھ کرجھانسی ریفرکر دیا لیکن تب تک کسان دم توڑ چکا تھا۔ رتن سنگھ پر بینک کا تقریباً10 لاکھ روپے کا قرض تھا۔اسی طرح 12 اکتوبر کو جالون کے جمریہی گاؤں کے کسان راجہ بھیانے خود کشی کر لی۔کسان راجا بھیا نے 2010 میں 60 ہزار کا قرض لیا تھا جو بڑھ کر 2 لاکھ 4 ہزار ہو گیا ہے۔بینک نے جب نوٹس بھیجا تو کسان نے خود کشی کر لی۔اب کسان رہنماؤں نے مطالبہ کیا ہے کہ بینک قرض ادائیگی کا نوٹس نہ بھیجے۔ فصل خراب ہونے سے پریشان کسانوں کو یہ نوٹس اور پریشانی میں ڈال دیتی ہے۔