بلیا قتل: فرار کلیدی ملزم کی گرفتاری کے لئے 25 ہزار کے انعام کا اعلان
بلیا،17؍اکتوبر(ایس او نیوز؍ایجنسی) ضلع بلیا کے گاؤں دُرجن پور میں انتظامی افسران کے سامنے فائرنگ کرکے ایک ایک شخص کو ہلاک کرنے کے معاملہ میں کلیدی ملزم دھیریندر پرتاپ عرف ڈبلیو سمیت 6 مطلوبہ ملزمان کے خلاف پولیس نے 25-25 ہزار کے انعام کا اعلان کیا ہے۔ فرار ملزمان کے تعلق سے انعام کا یہ اعلان ایس پی بلیا کی طرف سے کیا گیا ہے۔
قتل اور ہنگامہ آرائی کے واقعہ کے بعد اہم ملزم دھیریندر پرتاپ سنگھ نے ایک ویڈیو جاری کرکے دعوی کیا ہے کہ اس نے کوئی گولی نہیں چلائی۔ اس کے ساتھ ہی اس کا مطالبہ ہے کہ معاملہ کی پوری جانچ ہونی چاہئے۔ اپنے بیان میں دھیریندر پرتاپ نے کہا تھا کہ ’’15 اکتوبر کو راشن کی دکانوں کا الاٹمنٹ ہونا تھا اور اس وجہ سے کئی افسران گاؤں میں آئے ہوئے تھے۔ میں نے بھی ایس معاملہ پر ایس ڈی ایم اور بی ڈی او سے ملاقات کی تھی۔‘‘
بی جے پی رکن اسمبلی سریندر سنگھ کے قریبی دھیریندر نے مزید کہا کہ اس نے افسران کو بے ضابطگیوں کے حوالہ سے آگاہ کیا تھا۔ اس نے ایس ڈی ایم، بی ڈی او اور دیگر افسران پر بھی بدعنوانی کا الزام عائد کیا ہے۔ اس کے ساتھ ہی اس نے اس واقعہ کے لئے پولیس اور انتظامیہ کو ذمہ دار قرار دیا ہے۔
اس معاملہ میں بی جے پی کے رکن اسمبلی سریندر سنگھ کے بیان سے بھی بی جے پی حکومت کی کافی فضیحت ہوئی ہے۔ سریندر سنگھ نے کہا تھا کہ دھیریندر سنگھ نے خود کے دفاع میں گولی چلائی تھی۔ اس کے بعد سے حزب اختلاف کی جماعتیں یوگی حکومت پر حملہ آور بنی ہوئی ہیں۔
فائرنگ اور قتل کے اس معاملہ میں اے ڈی جی کی ہدایت پر بلیا کے اسی پی نے تین سب انسپکٹروں اور دو خاتون ملازموں سمیت سات کانسٹیبلوں کو معطل کر دیا ہے۔ دس پولیس اہلکاروں پر ایک ساتھ ہونے والی اس کارروائی کے بعد محکمہ پولیس میں ہلچل پیدا ہو گئی ہے۔