بنگلورو، 22؍مئی ( آئی این ایس انڈیا ) بنگلورو کی ایک سیشن عدالت نے تمل ناڈو کے ترونیل ویلی سے تعلق رکھنے والے رحمت اللہ کی ضمانت کی درخواست مسترد کر دی ہے، جو حال ہی میں کلاس رومز میں حجاب پہننے پر فیصلہ سنانے والے کرناٹک ہائی کورٹ کے ججوں کی جان کو مبینہ طور پر خطرے میں ڈالنے کے الزام میں عدالتی حراست میں ہے۔ سٹی سول اینڈ سیشن کورٹ نے ہفتے کے روز رحمت اللہ کی درخواست مسترد کر دی۔

محمد عثمانی، تمل ناڈو توحید جماعت کا رکن، اسی طرح کے الزامات میں گرفتار ایک اور شخص ہے۔ دونوں عدالتی تحویل میں ہیں۔ یاد رہے کہ کرناٹک ہائی کورٹ کے چیف جسٹس ریتو راج اوستھی، جسٹس کرشنا ڈکشٹ اور جسٹس قاضی ایم زیب النساء  پر مشتمل بنچ نے حال ہی میں کرناٹک کے تعلیمی اداروں میں حجاب پر پابندی کو برقرار رکھا تھا۔

رحمت اللہ اور عثمانی، دونوں تمل ناڈو سے ہیں،بتایا گیا ہے کہ ان کی ویڈیوز وائرل ہوئی  تھی جس میں انہوں نے ججوں کو مبینہ طور پر دھمکی  دی تھی۔ جب سرکاری وکیل بی ایس پاٹل نے عدالت کو باور کرایا کہ ملزم کے خلاف الزامات سنگین نوعیت کے ہیں اور اس کی تحویل ضروری ہے تو جج وی پرکاش نے ضمانت کی درخواست  کومسترد کر دیا۔