بھٹکل :15؍ اپریل(ایس اؤ نیوز) کورونا ازالے کو لےکر تیارکردہ انجکشن کے تقسیم کاری پروگرام کو بھٹکل تعلقہ میں کوئی تعاون نہیں مل رہاہے۔ انجکشن تقسیم کاری مہم میں مصروف افسران کے لئے عدم تعاون کا مسئلہ سردرد بن گیا ہے۔
45سے زائد عمرکے سبھی لوگوں کو مفت میں انجکشن لگوایا جارہاہے، لیکن اکثر لوگ اس سلسلےمیں پس و پیش کا شکارہیں۔ بھٹکل شہر کے ہزاروں لوگ بیرون ملک میں مقیم ہیں اور اسی طرح بنگلورو، میسور سمیت ریاست کے مختلف مقامات اور بیرون ریاست میں بھی مقیم ہیں۔ روزانہ سیکڑوں لوگوں کی آمد ورفت ہوتی ہے۔ افسران کو خوف ستائے جارہا ہے کہ ان آنے جانے والوں میں سے کوئی ایک بھی کورونا کا متاثر نکلا تو شہر پھر ایک بار کورونا وباء کی زد میں آسکتاہے۔
اس سے قبل جب تعلقہ میں کورونا کے متاثرین میں لگاتار اضافہ ہورہاتھاتو تنظیم، رابطہ سوسائٹی وغیرہ نے کورونا کی روک تھام میں اپنا اہم رول ادا کیا تھا۔ اب عوامی نمائندے اور افسران کی خواہش ہے کہ تنظیم دوبارہ اسی رول کو ادا کرے اور ہرایک کو انجکشن کے لئے تیار کرائے۔ انجکشن کے متعلق غلط فہمی ہونے اور خوف کی وجہ سے لوگ انجکشن نہیں لگوانے سے مسئلہ پیدا ہونے کا افسران نے خیال ظاہر کیا۔
ضلع میں سب سے کم :اترکنڑا ضلع میں کورونا انسداد انجکشن کو بھٹکل میں سب سے کم لوگوں نے لگوایا ہے۔ 45سے 60کے درمیان والے عمر کے لوگوں نے 2618اور 60سے زائد عمر والوں میں 4087لوگوں نے انجکشن لگوائے ہیں۔ تعلقہ کی آبادی کے مطابق دیکھیں تو بہت ہی کم شرح ہے۔ تعلقہ میں کل 10مختلف مقامات پر انجکشن لگوانے کے سنٹر قائم کئے گئے ہیں۔ جنہوں نے بھی انجکشن لیا ہے ان میں کوئی بھی سائڈ افکٹ نہیں دیکھاگیا ہے۔ ان حالات میں انجکشن کا لگوانا بہت ہی مناسب ہونے کا تعلقہ میڈیکل آفیسر ڈاکٹر مورتی راج بھٹ نے خیال ظاہر کیا۔