نئی دہلی،7؍ستمبر (ایس او نیوز؍یو این آئی)  سپریم کورٹ نے جمعہ کو اجودھیا تنازعہ کی سماعت رد کرنے سے متعلق ایک عرضی کو خارج کر دیا۔ انٹرکانٹی نینٹل اسوسی ایشن آف لائرس نامی تنظیم نے سپریم کورٹ میں عرضی دائر کرکے اجودھیا تنازعہ کی سماعت رد کرنے اور مقدمے کے عرضی گزار کے خلاف ایف آئی آر در ج کرنے کی اپیل کی تھی۔

چیف جسٹس رنجن گوگوئی نے عرضی کے دوران کہا، ’’یہ کس طرح کی عرضی ہے۔ اپنی عرضیوں پر نظر ڈالیے۔‘‘ گوگوئی اور جسٹس اشوک بھوشن کی بنچ نے عرضی خارج کر دی۔

غورطلب ہے کہ بابری مسجد۔رام مندرزمین تنازعہ کی سماعت سی جے آئی گوگوئی کی صدارت والی آئینی بنچ کر رہی ہے۔ بنچ کے دیگرارکان، جسٹس ایس اے بوبڈے، جسٹس ڈی وائی چندرچوڈ، جسٹس اشوک بھوشن اور جسٹس ایس عبد النذیر ہیں۔

اس تنازعہ کو ثالثی کے ذریعے سلجھانے کی تمام کوششوں کے ناکام ہوجانے کے بعد سپریم کورٹ میں گذشتہ 6 اگست سے روز مرہ کی بنیاد پر اس معاملے کی سماعت کی جارہی ہے۔ 6 اگست سے سماعت شروع ہونے کے بعد پہلے ہندوفریق کو سنا گیا اور اس کے بعد مسلم فریق نے بنچ کے سامنے اپنے دلائل رکھے۔