کاروار،15؍اگست (ایس او نیوز) ملک کی آزادی کے 76 ویں جشن کی تقریب میں ضلع انچارج وزیر کوٹا سرینواس پجاری نے پرچم کشائی کرتے ہوئے کہا کہ سماج کے تمام طبقات کو یکساں حقوق اور سہولتیں فراہم کرنے کے مقصد سے کرناٹکا حکومت نے بہت سارے منصوبے بنائے ہیں جس کا فائدہ غریبوں ، کسانوں ، عورتوں ، بچوں ، بزرگ شہریوں اور جسمانی معذوروں وغیرہ کو برابر مل رہا ہے۔
    
انہوں نے کہا کہ سوشیل ویلفیئر ڈپارٹمنٹ  کے مطالبہ پر ریاست کے 24 لاکھ افراد کو ماہانہ 75 یونٹ بجلی مفت میں فراہم کی جا رہی ہے ۔ ضلع شمالی کینرا کو ایک ماڈل ضلع بنانے کے مقصد سے پوری منصوبہ بندی کے ساتھ تعمیر و ترقی کے کام کیے جا رہے ہیں ۔ گئو ہتھیا قانون کے تحت ضلع کے لئے ایک گئو شالہ کی تعمیر ہلیال میں کی جارہی ہے جس پر 50 لاکھ روپے کا خرچ آئے گا ۔ اس کے علاوہ مزید 5 نئے گئو شالاوں کو منظوری دی گئی ہے ۔ جانوروں کے علاج و معالجہ کے لئے ہر تعلقہ کے لئے ایک سنجیونی گاڑی منظور کی گئی ہے۔ 
    
انہوں نے کہا کہ ضلع کے اچوے گرام میں ریوینیو وزیر نے قیام کا پروگرام رکھا جس میں غریبوں کو زمین کے کاغذات ، پینشن وغیرہ منظور کرنے کے علاوہ بغیر بجلی والے تقریباً 9 ہزار گھروں کو بجلی کنکشن فراہم کرنے کے لئے اقدامات کیے گئے ۔ ضلع میں سیلاب سے کسانوں کو ہونے والے نقصان کی بھرپائی کے لئے 39,529 کسانوں کے کھاتے میں فصل انشورنس کی رقم کے طور پر 10.49 کروڑ روپے منتقل کیے گئے ۔ ماہی گیروں کو حکومت کی طرف سے 25 میل دور سمندر میں مچھلیوں کے شکار کے لئے سبسیڈی کے ساتھ کشتیاں فراہم کی جا رہی ہیں۔ 
    
وزیر موصوف نے بتایا کہ ضلع میں پبلک پرائیویٹ پارٹنرشپ بنیاد پر سوپر اسپیشالٹی ہاسپٹل تعمیر کرنے کے لئے حکومت کو تجویز بھیجی گئی ہے اور بہت   سارے عوام کے جذبات سے تعلق رکھنے والے اس منصوبے کو منظوری مل جائے گی ۔ پردھان منتری آیوشمان اسکیم کے تحت کاروار میڈیکل انسٹی ٹیوٹ کو 50 بستروں والا ایمرجنسی کیئر یونٹ قائم کرنے کے لئے منظوری مل گئی ہے اور انکولہ کے ہٹی کیری میں یہ یونٹ قائم کیا جائے گا۔   
    
اس تقریب کے دوران ہلیال کی چائلڈ ویلفیئر پروجیکٹ آفیسر لکشمی دیوی کو بہترین کارکردگی کے لئے ایوارڈ سے نوازا گیا ۔ ایس ایس ایل سی اور پی یو سی میں سب سے زیادہ نمبرات پانے والوں کو لیپ ٹاپ دئے گئے ۔ لیبر ڈپارٹمنٹ کی طرف سے تعمیراتی مزدوروں میں شادی اور زچگی کے لئے امدادی رقم اور غذائی کٹس وغیرہ تقسیم کی گئیں۔  
    
پرچم کشائی کی تقریب سے پہلے ضلع آرمڈ ریزرو فورس ، سویلین پولیس یونٹ ، لیڈی پولیس فورس ، محکمہ جنگلات ، ہوم گارڈس چنڈیا یونٹ ، کرناٹکا آرٹس اینڈ سائنس کالج کی نیول یونٹ اور کرناٹکا بٹالین نے مارچ پاسٹ کیا ۔ تقریب کا اختتام مختلف اسکولی بچوں کے تفریحی و ثقافتی پروگرام پر ہوا۔ 
    
ایم ایل اے روپالی نائک ، ایم ایل سی گنپتی الویکر ، کاروار سی ایم سی صدر ڈاکٹر نتین ایس پیکلے ، ضلع ڈی سی مولئی موہیلن ، ضلع ایس پی ڈاکٹر سومن پینیکر ، ضلع پنچایت سی ای او پریانگا ایم سمیت معززین شہر کی بڑی تعداد موجود تھی۔