سپریم کورٹ میں ایودھیا کیس سے متعلق نظرثانی کی درخواستوں پر سماعت
نئی دہلی11دسمبر(ایس او نیوز/آئی این ایس انڈیا)سپریم کورٹ جمعرات کو ایودھیا تنازعہ سے متعلق فیصلے کے خلاف دائر نظرثانی درخواستوں کی سماعت کرے گا۔ عدالت عالیہ نے دوپہر 1:40 میں چیمبر میں ان درخواستوں کی سماعت کرنے کا فیصلہ کیا ہے۔ ادھر نرموہی اکھاڑا نے عدالت نے 9 نومبرکو دیئے گئے فیصلے کے خلاف نظرثانی کی درخواست بھی دائر کردی ہے۔اس سے پہلے کئی مسلم فریقوں نے نظرثانی کی درخواستیں داخل کی ہیں۔جس میں سوال اٹھایاگیاہے کہ جب مورتی رکھناغلط تھا،مسجدکی شہادت غلط تھی توغیرقانونی مورتی کوقبضہ کیسے دیاگیاہے۔ نرموہی اکھاڑا نے اراضی کے بارے میں کوئی سوال نہیں اٹھایا ہے، بلکہ انتظام کے حقوق، قبضے اور حدود سے متعلق فیصلے پر سوال اٹھایا ہے۔ نرموہی اکھاڑا کے ترجمان کارتک چوپڑا نے یہ اطلاع دی ہے۔ ذرائع کے مطابق نرموہی اکھاڑا نے بھی اپنی درخواست میں سپریم کورٹ سے رام مندرکے ٹرسٹ میں رول کا فیصلہ کرنے کا مطالبہ کیاہے۔نرموہی اکھاڑہ کے علاوہ آل انڈیا مسلم پرسنل لا بورڈ اور مسلم فریق کی جمعیت علمائے ہند نے بھی نظرثانی کی درخواست داخل کی ہے۔ اس پٹیشن میں 14 نکات پر غور کرنے پر زور دیتے ہوئے کہاگیا ہے کہ بابری مسجد کی تعمیر نو کو ہدایت دے کر ہی اس معاملے میں مکمل انصاف ہوسکتا ہے۔