ایودھیا معاملہ: ثالثی کمیٹی نے سپریم کورٹ کو سونپی رپورٹ، اگلی سماعت 2 اگست کو
نئی دہلی، 18؍جولائی (ایس او نیوز؍ایجنسی) ایودھیا تنازعہ معاملہ پر اگلی سماعت اب 2 اگست کو سپریم کورٹ میں ہوگی۔ آج ثالثی کمیٹی نے اپنی رپورٹ سپریم کورٹ کو سونپ دی ہے۔ عدالت نے کمیٹی سے اب حتمی رپورٹ سونپنے کے لئے 31 جولائی تک کا وقت دیا ہے۔ اس کے بعد 2 اگست کو اس معاملہ پر اگلی سماعت ہو گی۔ یعنی اس دن سپریم کورٹ فیصلہ کرے گا کہ معاملہ کا حل ثالثی سے نکالا جائے گا یا پھر روزانہ سماعت سے۔
سپریم کورٹ رام جنم بھومی۔ بابری مسجد تنازعہ معاملہ میں ثالثی کی پیش رفت پر جمعرات کو رپورٹ کا مطالعہ کر سکتا ہے۔ چیف جسٹس آف انڈیا رنجن گوگوئی کی سربراہی والی پانچ ججوں کی آئینی بینچ نے اس مسئلے پر 11 جولائی کو رپورٹ مانگی تھی۔ سپریم کورٹ نے کہا تھا کہ اگر عدالت ثالثی کی کارروائی کو مکمل کرنے کا فیصلہ کرتی ہے تو 25 جولائی سے روزانہ کی بنیاد پر سماعت شروع کی جا سکتی ہے۔