بنگلورو: ذیابیطس سے متاثر پیروں اور اس سے جڑے مسائل کے متعلق بیداری ریلی
بنگلورو، 21؍نومبر(ایس او نیوز؍)ذیابیطس سے متاثر پیروں اور اس سے جڑے مسائل کے متعلق عوام میں بیداری لانے کے مقصد سے فٹ سیکور نے کرناٹک انسٹی ٹیوٹ آف انڈو کرانولوجی اینڈ ریسرچ(کے آئی ای آر) کے اشتراک سے فٹ سیکور ادارہ نے بائیک ریلی کا اہتمام کیا اور اعلان کیا کہ ہر سال 14نومبر کو عالمی یوم ذیا بیطس کی مناسبت سے اس طرح کا پروگرام منعقد کرتی رہے گی۔
بائیک ریلی کو بروہت بنگلور مہا نگر پالیکے(بی بی ایم پی) کے چیف کمشنر تشار گری ناتھ نے جھنڈی دکھا کر روانہ کیا،اس مو قع پر بی بی ایم پی کے اسپیشل کمشنر شعبہ صحت ڈاکٹر تر لوک چندرا، کے آئی ای ادارہ کے ڈائرکٹر ڈاکٹر روی کے،بی بی ایم پی کے چیف ہیلتھ آفسر ڈاکٹر بالا سندر حاضر رہے۔فٹ سیکور کے بانی و ذیا بیطس کے ماہر ڈاکٹر سنجے شرما نے کہا کہ ہر 20سکینڈ کو ایک شخص ذیابیطس کی وجہ سے اپنے پیر سے محروم ہوجاتا ہے جبکہ 200ملین افراد جو ذیابیطس سے متاثر ہیں، اپنے پیروں سے معذور ہو چکے ہیں۔
انہوں نے بتا یا کہ ذیابیطس کی وجہ سے معذور ہونے والوں کی تعداد 12لاکھ ہے جنہوں نے اپنے ناموں کا اندراج کیا ہے۔انہوں نے بتا یا کہ ملک میں ہر سال 14 لاکھ افراد کو مصنوعی پیر لگائے جاتے ہیں۔ مذکورہ بائیک ریلی میں 500سے زائد افراد نے اپنی دو پہیہ والی گاڑیوں کے ذریعہ حصہ لیا۔ اس موقع پر ہینڈ بل کا اجراء بھی عمل میں لایا گیا۔ ریلی ڈملور،السور، داسپت اسپتال،ماگڑی روڈ،پیالس گٹہلی کے علاوہ شہر کے بی بی ایم پی پرائمری ہیلتھ مراکزپر پہنچ کر ذیابیطس سے متاثر پیروں اور اس سے جڑے مسائل کے متعلق عوام میں بیداری پیدا کی۔