آسٹریلیا میں جنگلاتی آگ شدید ہوتی ہوئی
سڈنی،16نومبر(آئی این ایس انڈیا)آسٹریلیا کے مشرقی اور مغربی حصوں میں جنگلاتی جھاڑیوں میں لگی آگ شدید ہوتی جا رہی ہے۔ اس آگ کے پھیلنے سے قریبی انسانی بستیوں کے لیے خطرات بھی بڑھ گئے ہیں۔ مغربی آسٹریلیا میں درجہ حرارت چالیس ڈگری سینٹی گریڈ تک پہنچ گیا ہے اور شدید گرمی کے ساتھ ساتھ تیز ہوائیں بھی آگ کے پھیلنے کی وجہ ہیں۔ دو آسٹریلوی ریاستوں نیو ساؤتھ ویلز اور کوئینز لینڈ میں یہ جنگلاتی آگ ایک لاکھ بارہ ہزار ایکڑ رقبے پر پھیلی ہوئی ہے۔ اب یہ آگ پھیلتی ہوئی بہت بڑے شہر سڈنی کے نواحی علاقے تک پہنچ گئی ہے۔ ایک ہزار سے زائد فائر فائٹر دن رات اس آگ کو بجھانے میں مصروف ہیں۔ آگ کی لپیٹ میں آ کر جل جانے والے مکانوں کی تعداد تین سو بتائی گئی ہے۔ اس آگ کے نتیجے میں اب تک چار افراد ہلاک ہو چکے ہیں۔