لندن ،27؍ مارچ(ایس او نیوز؍ آئی این ایس انڈیا ) انگلینڈ کے سابق کپتاین مائیکل وان نے کہا کہ انہیں اس بات کا پکا یقین ہے کہ آسٹریلیا نے انگلینڈ کے خلاف حالیہ ٹیسٹ سیریز کے دوران بال ٹیمپرنگ (گیند کے ساتھ چھیڑ چھاڑ)کی تھی۔غور طلب ہے کہ آسٹریلیائی ٹیم کے کپتان سٹیو اسمتھ کو جنوبی افریقہ کے خلاف تیسرے ٹیسٹ میچ کے دوران گیند سے چھیڑ چھاڑ کرنے کی منصوبہ بندی میں شامل ہونے کے لیے آئی سی سی نے ایک میچ کے لئے معطل کر رکھا ہے۔کرکٹ آسٹریلیا نے اسمتھ کو ٹیم کی کپتانی سے بھی ہٹا دیا ہے۔حالانکہ اسمتھ نے کہا تھا کہ یہ پہلا موقع تھا جبکہ ان کی کپتانی میں ایسا (گیند ٹیمپرنگ)معاملہ ہوا لیکن 2005 میں ایشز جیت کے دوران انگلینڈ کے کپتان رہے وان کا خیال ہے کہ ایسا پچھلے کچھ عرصے سے چل رہا ہے۔وان نے کہاکہ میں نہیں مان سکتا کہ ایسا پہلے نہیں ہوا تھا۔میں نے دیکھا کہ زیادہ ترفیلڈروں نے بہت پٹیاں باندھ رکھی تھی بالخصوص ایشز سیریز کے دوران۔وہ مڈ آف، مڈ آن پر کھڑے رہتے تھے۔آپ ان کا نام نہیں لینا چاہتے لیکن وہ جانتے ہیں کہ وہ کون ہیں۔