منگلورو 23/اکتوبر (ایس او نیوز)شہر کے نیرو مارگا کے قریب ایک رکشا ڈرائیور پر تلوار سے حملہ کرنے کے الزام میں کیلرائی شمشان کے پاس سے اس حملے میں ملوث 9ملزمین کو منگلورو پولیس نے گرفتار کرلیا ہے۔

 گرفتار شدہ ملزمین کے نام نتین پجاری، دھن راج، شیوانند اچاری، گنیش، جیون پجاری، سنتوش پجاری، دھیرج سپلیا، راگھویندرا پجاری، پرانیش پجاری بتائے جاتے ہیں۔اس حملے میں زخمی ہونے والے رکشا ڈرائیور سنتوش (35سال) اسپتال میں زیر علاج ہے۔

موصولہ رپورٹ کے مطابق سنتوش ایک دکان سے ناریل کا تیل خرید کر اپنے رکشا میں گھر کی طرف جارہا تھا۔ اس دوران دو افراد اسکوٹر پر آئے اور اس کا راستہ روک کر اس کے ساتھ جھگڑنا شروع کیا۔جب بات حد سے بڑھ گئی تو انہوں نے اپنے ساتھ لائی ہوئی تلوار سے سنتوش پر حملہ کردیا جس کی وجہ سے اس کے دونوں ہاتھ اور پیروں پر گہرے زخم آئے اور سنتوش خون میں لت پت ہوکر زمین پر گرگیا۔حملے کے بعد یہ شرپسند موقع پر سے فرار ہوگئے۔ مقامی لوگوں نے فوری طورپر سنتوش کو اسپتال میں منتقل کیا۔مقامی لوگوں کا کہنا ہے کہ سنتوش، نتین اور پرانیش تینوں گہرے دوست تھے اور ایک ہی تنظیم سے جڑے ہوئے تھے۔ لیکن پچھلے دو سال سے سنتوش نے اس تنظیم کی سرگرمیوں سے علاحدگی اختیار کرلی تھی اور اپنے کام سے کام رکھنے لگاتھا۔لیکن تنظیم سے متعلق بعض معاملات میں سنتوش اور اس کے بقیہ دو دوستوں کے درمیان بڑا اختلاف پیدا ہوگیا تھا۔اسی مسئلے پر 17اکتوبر کی صبح میں بھی ان تینوں کے بیچ تکرار ہوئی تھی۔ اس کے کچھ ہی دیر بعد سنتوش پر جان لیواحملہ کیا گیا تھا۔

منگلورو مضافاتی پولیس نے کیس درج کرلینے کے بعد کارروائی کرتے ہوئے جن ملزمین کو گرفتار کیا ہے ان میں سے نتین اورپرانیش پر شہر کے مختلف پولیس تھانوں میں بہت سارے مجرمانہ معاملات درج ہیں اور ان کا نام راؤڈی شیٹر میں شامل ہے۔قاتلانہ حملے میں ملوث ملزمین کو چند ہی دنوں کے اندر گرفتار کرنے پرمنگلورو پولیس کمشنر ڈاکٹر پی ایس ہرشا نے تحقیقاتی ٹیم کی ستائش کی ہے۔