دبئی، 16؍اکتوبر(ایس او نیوز؍ایجنسی) ٹورسٹ ویزا رکھنے والوں کے لئے داخلہ کی شرائط پر پورا نہ اُترنے پر زائداز 50 ہندوستانی شہری ، دبئی انٹرنشینل ایئر پورٹ پر پھنس گئے ہیں۔ 

خلیج ٹائمس کی رپورٹ کے مطابق ہندوستانی شہری چہارشنبہ کی رات 9 بجے سے پھنسے ہوئے ہیں۔ چہارشنبہ کے روز یہ اطلاع دی گئی تھی کہ دیگر ممالک کے ویزٹ ویزا رکھنے والے افراد جن میں 304 پاکستانی شہری بھی شامل ہیں، داخلہ شرائط کی عدم تکمیل پر ائیر پورٹ پر پھنس گئے ہیں۔ کئی ہندوستانی مسافر کنور، کیرالہ اور ممبئی سے گوائیر کی پروازوں کے ذریعہ پہنچے تھے۔ 

دبئی میں ہندوستان کے قونصل خانہ کے پریس سکریٹری نیرج اگروال نے بتایا کہ مجموعی طورپر 57 ہندوستانی شہری پھنسے ہوئے ہیں۔ اس نے کہا کہ قونصل خانہ کو ہماری ہیلپ لائن کے ذریعہ ان کے موقف سے واقف کرایا گیا تھا۔ 

ذرائع کے مطابق 14 ہندوستانی شہریوں کو دبئی میں داخل ہونے کی اجازت دے دی گئی ہے۔ جبکہ دیگر افراد پھنسے ہوئے ہیں۔ قونصل خانہ کا عملہ پھنسے ہوئے مسافرین کی مدد کررہا ہے۔ انہیں غذا پانی اور دیگر سہولتیں فراہم کی جائیں گی۔ 

خلیج ٹائمس نے اگروال کے حوالہ سے بتایا کہ ہم مقامی امیگریشن قوانین کا پورا احترام کرتے ہیں اور یہ کافی عرصہ سے نافذ العمل ہیں۔ بہرحال مسافرین کو پروازوں مییں سوار ہونے سے پہلے ان کے بارے میں بتایا جانا چاہئے تھا۔ میری معلومات کے مطابق ان قوانین کو سختی کے ساتھ نافذ نہیں کیا جاتا ہے۔ اگر پالیسی میں کوئی تبدیلی آئی ہے تو مسافرین کو 2 دن پہلے اس کے بارے میں بتایا جانا چاہئے تھا۔ اسی دوران کئ مسافرین نے شکایت کی ہے کہ انہیں غذا اور پانی تک رسائی حاصل نہیں۔ 

ایسے ہی ایک مسافر امل دیو نے جو کنور انٹر نینشنل ائیر پورٹ سے گوائر کی پراوز سے تقریباً 9 بجے شب پہنچے تھے، بتایا کہ دبئی کا یہ میرا تیسرا دورہ ہے۔ میں نے ابھی ابھی مرچنٹ نیوی کورس مکمل کیا ہے اور میرے ایک رشتہ کے بھائی نے میرے لئے دبئی میں ملازمت تلاش کی ہے۔ مجھے امید تھی کہ میں یہاں منتقل ہونے کے بعد ایمپلائمنٹ ویزا حاصل کرلوں گا۔ 

امیگریشن حکام نے مجھ سے دریافت کیا کہ آیا میرے پاس 2 ہزار درہم اور کسی ہوٹل کا ریزرویشن موجود ہے؟ نفی میں جواب دینے پر مجھے اور دیگر 27 ملیائی مسافرین کو ٹرمنل 3 میں منتقل کردیا گیا  جہاں ہم لوگ کل رات سے پھنسے ہوئے ہیں۔