گلبرگہ،29؍ستمبر (ایس او نیوز) ریاست کرناٹک کے گلبرگہ میں آل انڈیا مجلس اتحادالمسلمین کی جانب سے منعقدہ عوامی جلسہ سے خطاب کرتے ہوئے صدر اسدالدین اویسی نے کانگریس کو تنقید کا نشانہ بنایا۔

حیدرآباد کے رکن پارلیمنٹ اسدالدین اویسی نے کہا کہ اس سے پہلے کرناٹک میں مجلس کی طاقت کم تھی جس کی وجہ سے انتخابات میں حصہ نہیں لیا گیا تھا لیکن آج کرناٹک کے مختلف مقامات پر مجلس ایک طاقتور جماعت کے طور پر ابھری ہے۔

انہوں نے جلسہ سے خطاب کرتے ہوئے یہ اعلان کیا کہ کرناٹک میں ہونے والے آئندہ انتخابات میں مجلس بڑھ چڑھ کر حصہ لے گی۔

اسدالدین اویسی نے کانگریس پر تنقید کرتے ہوئے کہا کہ بی جے پی اور کانگریس ایک ہی سکے کے دو رُخ ہیں۔ انہوں نے کانگریس پر الزام عائد کرتے ہوئے کہا کہ پارٹی مسلمانوں کو ووٹ بینک کی طرح استعمال کرتی ہے۔

انہوں نے خطاب کرتے ہوئے کہا کہ مسلمانوں کو کانگریس اور بی جے پی کی غلامی سے نجات دلانا ضروری ہے۔

گلبرگہ میں منعقدہ ایم آئی ایم کے اجلاس میں ہزاروں افراد نے شرکت کی۔