نئی دہلی،14/دسمبر(ایس او نیوز/ آئی این ایس انڈیا) شہریت ترمیمی قانون کے خلاف اے آئی ایم آئی ایم کے لیڈر اسد الدین اویسی نے سپریم کورٹ میں عرضی داخل کی ہے۔اویسی کے وکیل نظام پاشا نے اس بات کی معلومات دیں۔اویسی کے علاوہ آسام کے اپوزیشن لیڈر دیب برت ساکیااور بارپیٹا کے لوک سبھا ممبر پارلیمنٹ عبدالخالق نے بھی عرضی داخل کی ہے۔اس کے علاوہ ماریانا اسمبلی سیٹ سے ممبر اسمبلی روپ جیوتی کرمی نے بھی سپریم کورٹ میں شہریت قانون کے خلاف عرضی دی ہے۔بتا دیں کہ اسد الدین اویسی نے پارلیمنٹ میں اس شہریت بل کی مخالفت کرتے ہوئے بل کی کاپی پھاڑ دی تھی۔انہوں نے کہا تھا کہ یہ بل ملک کو بانٹنے والا ہے اور آئین کی اصل روح کے خلاف ہے۔اویسی نے کہا تھا کہ یہ بل مسلم کو بے وطن بنانے جیسا ہے اور ملک کی حفاظت کے لئے بھی خطرہ بن سکتا ہے۔