نئے اسپیکر کو مبارکباد دیتے ہوئے اویسی نے کہا، آپ ہاؤس کے ریفری ہیں، ریفری کی طرح ہی رہیں کھلاڑی نہ بنیں
نئی دہلی، 19 جون(ایس او نیوز/آئی این ایس انڈیا) راجستھان کے کوٹہ سے بھارتیہ جنتا پارٹی کے ٹکٹ پر الیکشن جیت کر آئے اوم بڑلا کو بلامقابلہ لوک سبھا اسپیکر منتخب کرنے کے بعد جہاں بہت سارے ارکان پارلیمان نے انہیں مبارکباد دی، وہیں اے آئی ایم آئی ایم کے سربراہ اسد الدین اویسی نے بھی انہیں مبارکباد پیش کی، مگر انہوں نے اس موقع پر کہا کہ آپ میچ کے ریفری کی طرح ہیں، لہٰذا آپ کو ریفری کی طرح ہی کام کرنا چاہئے ، اویسی نے انہیں مشورہ دیا کہ آپ کھیل کاحصہ نہ بنیں۔
حیدرآباد سے ممبر پارلیمنٹ اسد الدین اویسی نے کہاکہ میں آپ کو یاد دلانا چاہتا ہوں کہ آپ جس کرسی پر فائز ہوئے ہیں، آپ کام کام اُس عہدے پر رہ کر ملک کے قوانین کی حفاظت کرنا ہے۔آپ کو اس ہاؤس کا ریفری مقرر کیا گیا ہے، آپ ریفری ہی بنے رہ سکتے ہیں ، ا اپ کھیل کا حصہ نہیں بن سکتے۔اویسی نے کہا کہ آپ دائیں بازو سے آئے ہیں، آپ کی نظریات بھی ویسے ہی ہو سکتے ہیں لیکن میری آپ سے گزارش ہے کہ آپ بائیں سائڈ کو بھی دیکھیں ۔انہوں نے کہا کہ آپ کی طاقت بہت زیادہ ہے، تو جب آپ ان کا استعمال کریں تو یہ یاد رکھیں کہ ایوان میں بحث کا ماحول بنا رہے نہ کہ تکرار کا۔اویسی نے اوم بڑلا کو مبارکباد دیتے ہوئے کہا کہ اگر کوئی وزیر آپ سے بل کو جلد پاس کرانے کے لئے آئے تو آپ اس پر صحیح فیصلہ لیں اور اگر اسے پارلیمانی کمیٹی کے پاس جانے کی ضرورت ہے، تو وہاں پر ضرور بھیجیں،حکومت کے دباؤ میں نہ آئیں۔
آپ کو بتا دیں کہ اوم برلا کے نام کی تجویز نریندر مودی نے کی تھی،جس کی ان کے ساتھی اور دیگر اپوزیشن جماعتوں نے حمایت کی۔انتخابات کے بعد تمام جماعتوں کی جانب سے انہیں مبارکباد دی گئی۔