نئی دہلی،26؍اگست(ایس او نیوز؍یو این آئی) بھارتیہ جنتا پارٹی (بی جے پی) کے سینئر رہنما اور سابق وزیرخزانہ ارون جیٹلی کی آخری رسومات آج یہاں جمنا کے کنارے نگم بودھ گھاٹ پر03:15 بجے سرکاری اعزاز کے ساتھ ادا کی گئیں۔ جیٹلی کو ان کے بیٹے روہن کے آگ دیتے ہی دہلی پولیس کی ایک مسلح ٹکڑی نے سلامی دی۔اسی وقت بارش ہونے لگی۔ ان کی بیوی سنگیتا اور بیٹی سونالی،اہل خانہ اور دیگر کی آنکھوں میں آنسو تھے۔ اس موقع پر نائب صدر جمہوریہ ایم ونکیانائیڈو، لوک سبھا اسپیکر اوم برلا،وزیر دفاع راجناتھ سنگھ، وزیر داخلہ امیت شاہ، راجیہ سبھا میں اپوزیشن کے رہنما غلام نبی آزاد، بی جے پی کے کارگزار صدر جے پی نڈا،بی جے پی کے سینئر رہنما لال کرشن اڈوانی،مرکزی وزیر رام ولاس پاسوان، بی جے پی کے نائب صدر شیوراج سنگھ چوہان، چھتیس گڑھ کے سابق وزیر اعلیٰ رمن سنگھ، بی جے پی کے جنرل سکریٹری بھوپیندر یادو، رام مادھو، انل جین، پارٹی کے قومی میڈیاکے سربراہ انل بلونی، سادھوی نرنجن جیوتی، پرہلاد سنگھ پٹیل سمیت دیگر رہنما موجود تھے۔وزیر اعظم مودی بیرون ممالک کے دورے پرہونے کی وجہ سے شریک نہیں ہوپائے۔آخری رسومات سے قبل ہی بہار کے وزیر اعلیٰ نتیش کمار، مہاراشٹر کے وزیر اعلیٰ دیویندر فڑنویس، ہریانہ کے وزیراعلیٰ منوہر لال کھٹر سمیت دیگر رہنما بھی نگم بودھ گھاٹ پہنچے۔ یوگ گرو بابارام دیو اور بھوٹان کے نمائندے بھی آخری رسومات ادا کرنے کے دوران موجود تھے۔آخری رسومات سے قبل جیٹلی کی لاش کو بی جے پی کے ہیڈکوارٹر سے نگم بودھ گھاٹ لایا گیا۔ خیال رہے کہ ہفتے کے روز ایمس میں جیٹلی کی موت ہوگئی تھی۔جیٹلی کے جسد خاکی کو آج لوگوں کے آخری دیدار کے لئے قومی دارالحکومت میں ان کی رہائش گاہ کیلاش کالونی سے بھارتیہ جنتا پارٹی ہیڈکوارٹر لایا گیا۔ جیٹلی کے جسد خاکی کو پھولوں سے سجے فوج کی گاڑی سے بی جے پی ہیڈکوارٹر لایا گیا۔خیال رہے سابق وزیر خزانہ کا کل یہاں آل انڈیا انسٹی ٹیوٹ آف میڈیکل سائنسز (ایمس) میں لمبی بیماری کے بعد انتقال ہو گیا تھا۔ اس موقع پر پارٹی ہیڈکوارٹر میں بھارتیہ جنتا پارٹی کے صدر امیت شاہ، ایگزیکٹیو صدر جے پی نڈا، ریلوے کے وزیر پیوش گوئل، جیٹلی کی اہلیہ، بیٹی اور دیگر رہنما موجود تھے۔