کورونا کی زد میں ایک اور فوجی ڈاکٹر، ممبئی میں 10 مزید طبی اہلکار بھی کورونا پازیٹو
ممبئی،15؍اپریل (ایس او نیوز؍ایجنسی) ملک بھر میں کورونا وائرس کا قہر جاری ہے۔ ملک میں اب تک 11 ہزار سے زیادہ لوگ کورونا کی زد میں آ چکے ہیں اور 377 لوگوں کی جان جا چکی ہے۔ فکر کی بات یہ ہے کہ اس بیماری کی زد میں آنے والے طبی اہلکاروں، پولس اہلکاروں اور فوجی اہلکاروں کی تعداد لگاتار بڑھتی جا رہی ہے۔
دہلی میں فوج کا ایک اور ڈاکٹر کورونا پازیٹو پایا گیا ہے۔ بتایا جا رہا ہے کہ یہ ڈاکٹر جس کے رابطہ میں آیا، انھیں پروٹوکول کے تحت کوارنٹائن کر دیا گیا ہے۔ ڈاکٹر جس بلاک میں رہتا ہے اسے سینیٹائز کیا جا رہا ہے۔ لیفٹیننٹ کرنل رینک کے اس ڈاکٹر نے فی الحال کوئی بیرون ملکی دورہ بھی نہیں کیا ہے۔ بتایا جا رہا ہے کہ فوجی اہلکار مانیسر اور نریلا کے کوارنٹائن سنٹر میں گیا تھا۔ کورونا پازیٹو پائے جانے کے بعد ڈاکٹر کو علاج کے لیے فوج کے بیس اسپتال میں داخل کرایا گیا ہے۔
اس سے قبل 29 مارچ کو کولکاتا میں تعینات فوج کے ایک ڈاکٹر اور دہرہ دون میں تعینات ایک جے سی او کو بھی کورونا پازیٹو پایا گیا تھا۔ لداخ میں تعینات ایک جوان کو بھی کورونا پازیٹو پایا گیا تھا، حالانکہ یہ جوان اب ٹھیک ہو گیا ہے۔ فوج کی جانب سے کورونا وائرس کو لے کر ایک گائیڈ لائن جاری کی ہے، تاکہ کورونا وائرس فوج میں اندر تک نہ پھیلے۔
اس درمیان ممبئی کے ایک اسپتال کے 10 مزید طبی اہلکاروں میں کورونا وائرس کی تشخیص ہوئی ہے۔ اب تک اسپتال کے کل 35 ملازمین کا کورونا ٹیسٹ پازیٹو آ چکا ہے۔ سبھی ملازمین کا علاج اسپتال میں ہی کیا جا رہا ہے۔