کاروار:26؍نومبر(ایس اؤ نیوز)ضلع نگراں کار وزیر شیورام ہیبار نے  ارے بائیل سے لے کر اڈگوندی تک کی 16کلومیٹر قومی شاہراہ 63کو مکمل طورپر کانکریٹ سڑک میں منتقل کرنے کے لئے خصوصی توجہ دیتے ہوئے  52کروڑر وپئے کا منصوبہ تشکیل دے کر منظوری کے لئے مرکزی حکومت کو بھیج دیا ہے۔

ارے بائیل شاہراہ ٹرافک کے لئے بالکل مناسب نہیں رہی، پوری سڑک خستہ ہوگئی ہے، اس سے قبل متعلقہ سڑک کی درستی کےلئے 20کروڑ روپئے کی منظوری لینے میں کامیاب ہوئے تھے۔ مرکزی حکومت کے محکمہ قومی شاہراہ نے سال 2020-21 کے سالانہ منصوبے میں ریاست کے مختلف منصوبہ جات کے لئے کل 2619کروڑ روپئے منظور کئے ہیں۔ جس میں ارے بائیل سڑک کی درستی کے لئے 20کروڑ روپئے بھی میں شامل ہیں۔ 20کروڑ روپیوں کی مدد سے سڑک کی مرمت تو ہوگی لیکن اگلے ایک سال میں سڑک کی پھر وہی درگت ہونے کا خیال ظاہرکرتےہوئے شیورام ہیبار نے ارے بائیل سے اڈگونڈی تک سروے کرایا اور 16کلومیٹر لمبی سڑک کو مکمل طورپر کانکریٹ  میں منتقل کرنے کافیصلہ لیا۔ پی کیو سی (پیومنٹ کوالٹی کانکریٹ) کا استعمال کرتےہوئے سڑک کی تعمیر کی جائے گی تو طویل عرصے تک سڑک خراب یا خستہ نہیں ہوگی، کیونکہ سڑک کی تعمیر میں اسٹیل کی سلاخیں استعمال کئے جانے سے بھاری وزنی سواریوں کے گزرنے سے سڑک پر کوئی اثر نہیں ہوگا اور قریب ایک فٹ اونچا کانکریٹ ڈالے جانے سے سڑک کافی مضبوط و مستحکم رہنے کی  بات وزیر شیورام ہیبار نےکہی۔

سڑک تعمیر کے لئے 20کروڑ روپئے منظور ہوئے تو شیورام ہیبار نے کہاکہ صرف20کروڑروپیوں میں سڑک کے گڑھے وغیرہ بھرنے کے لئے ہی خرچ ہوجائیں گے اور اگلے ایک سال میں ہی سڑک دوبارہ خراب ہوجائے گی ۔ اس سلسلےمیں انہوں نے افسران کو کہاکہ وزیر اعلیٰ بی ایس یڈیورپا اور مرکزی وزیر نتین گڈکری سے منظوری لینےکی ذمہ داری میری ہے آپ پی کیوسی کانکریٹ والی سڑک تعمیر کا منصوبہ بنانے کہا ۔ اب وہ مرکزی حکومت کو بھیجا گیا ہے۔