اسلام کے خلاف نفرت انگیزی برداشت نہیں، ہندوستان میں مسلمانوں کے خلاف نفرت انگیزی پر عرب ممالک کا سخت ردعمل
نئی دہلی،21؍اپریل (ایس او نیوز؍ایجنسی) ملک میں مسلمانوں کے خلاف نفرت انگیزی کی وجہ سے کئی چھوٹے موٹے کام کرنے والوں اور سبزی بیچنے والوں پر حالیہ دنوں میں حملے ہوئے ہیں اور مسلمانوں کا معاشی بائیکاٹ کرنے کی بات بھی سامنے آئی ہے۔ تاہم ،اب یہ معاملہ طول پکڑ گیا ہے، ردعمل میں عرب ممالک میں پارلیمنٹیرین کی جانب سے کئی ٹوئٹ کئے گئے ہیں۔ جن میں کہا گیا ہے کہ اسلام کے خلاف نفرت انگیزی برداشت نہیں کی جائے گی۔
ان کا کہنا ہے کہ خلیج ممالک میں بہت سارے ہندوستانی کام کرتے ہیں جو نفرت انگیزی کررہے ہیں انہیں وزیر اعظم مودی کے پاس واپس بھیجا جائے۔ ٹویٹ کرنے والوں میں متحدہ عرب امارات، کویت اور انڈونیشا کے پارلیمنٹیرین شامل ہیں۔
اس کے پیش نظر آل انڈیا مسلم مجلس مشاورت کے صدر نوید حامد نے وزیر اعظم نریندر مودی کو ان ٹویٹس کی جانب توجہ دلاتے ہوئے ہندوستان کی شبیہ اور ہندوستانی اقتصادیات پر منڈلا رہے خطرات پر توجہ دلائی ہے۔