مودی حکومت کے خلاف بھی ’کرو یا مرو‘تحریک کی ضرورت:راہل گاندھی
نئی دہلی،9؍اگست (ایس او نیوز؍یو این آئی) کانگریس کے سابق صدر راہل گاندھی نے کہا ہے کہ بابائے قوم مہاتما گاندھی کی انگریزوں کے خلاف‘کرویامرو’جیسی تحریک کی طرح مودی حکومت کے خلاف بھی تحریک چلانے کی ضرورت ہے۔
ایک فیس بک پوسٹ میں مسٹر گاندھی نے کہاکہ تاریخ کا وہ صفحہ جسے کبھی فراموش نہیں کیا جا سکتا - بھارت چھوڑوتحریک8 اگست 1942 کو بمبئی سے شروع ہونے والی اس تحریک نے انگریزوں کی نیندیں اڑا دی تھیں۔ اگست کی اس شام کو لوگ بمبئی کے گووالیہ ٹینک میدان میں جمع ہونا شروع ہو گئے، گاندھی نے کرویامروکا نعرہ دیا اور ہندوستان میں برطانوی راج کا تقریباً آخری باب شروع ہوگیا۔
انہوں نے کہاکہ آج ہندوستان کی آمرانہ حکومت کے خلاف اور ملک کی حفاظت کیلئے ایک اور”کرو یا مرو“ تحریک کی ضرورت ہے، اب وقت آگیا ہے جب ناانصافی کے خلاف بولناہی ہوگا۔ آمریت، مہنگائی اور بے روزگاری کو ہندوستان چھوڑنا ہی ہوگا۔
کانگریس لیڈر نے کہا کہ گاندھی جی کی کال پر، اپنی جان کی پرواہ کیے بغیر لاکھوں ہم وطن اس تحریک میں کود پڑے، اس تحریک میں تقریباً 940 لوگ شہید ہوئے اور ہزاروں کی تعداد میں گرفتاریاں ہوئیں۔ انہوں نے کہاکہ آج، بھارت چھوڑو تحریک کی سالگرہ پر میں ان آزادی پسندوں کو خراج عقیدت پیش کرتا ہوں جنہوں نے ملک کی آزادی کیلئے اپنی جانیں قربان کیں۔