بھٹکل انجمن بی بی اے اینڈ بی سی اے کالج میں سالانہ کھیل مقابلوں کا انعقاد : کھیل دراصل شخصی تعمیر کا اہم ذریعہ ہے: انجمن الومنی سید سمیر سقاف
بھٹکل:27؍مارچ (ایس او نیوز)انجمن حامئی مسلمین بھٹکل کےانجمن بی بی اے اینڈ بی سی اے کالج بھٹکل کے 22ویں سالانہ کھیل مقابلوں کا27مارچ 2019 بروز بدھ کو انجمن آباد گراؤنڈ میں انعقاد ہوا۔
انجمن کے الومنی ڈی یو ٹیلی کام یواے ای کے سنئیر مینجر سید سمیر سقاف مہمان خصوصی کی حیثیت سے شریک ہوکر کھیل مقابلوں کا افتتاح کرنے کے بعد خطاب کرتےہوئے کہاکہ کھیل صرف جیت ہار کا معاملہ نہیں ہےدراصل شخصی تعمیر کا اہم ذریعہ ہے۔ جب ہم دوڑ (ریس)میں شامل ہوتے ہیں تو وہاں ملی سکینڈ کی بھی کتنی اہمیت ہوتی ہے پتہ چلتاہے اس طرح ہم کھیل کے ذریعے وقت کی پابندی سیکھ سکتے ہیں، وہیں کھیل کے ذریعے اجتماعی قوت کا پتہ چلتاہے ، ٹیم ورک کی طرح کتنے کام کرسکتے ہیں محسوس کرسکتے ہیں۔ اور کھیل سے جیت کیسے منانی چاہئے یہ بھی سیکھنےکو ملتاہے۔ انہوں نے کہاکہ آج کل کھیل بھی ایک کیرئیر بن گیا ہے، کئی کالجس اور یونیورسٹیز میں ماسٹر کورس چل رہے ہیں اس کے علاوہ روزگار میں بھی کھلاڑیوں کے لئے ریزرویشن ہوتاہے، کالجوں اور یونیورسٹیز میں کھلاڑیوں کو وظیفے دئیے جاتےہیں۔ انجمن ڈگری کالج بورڈ سکریٹری محمد محسن شاہ بندری نے افتتاحی تقریب کی صدارت کی۔ اس موقع پر جنرل سکریٹری صدیق اسماعیل ، ایڈیشنل جنرل سکریٹری محمد اسحق شاہ بندری، کالج بورڈ سکریٹری آفتاب قمری ، پرنسپال کے محمد محسن ، فزیکل ڈائرکٹر موہن میستا، اسٹوڈنٹس سکریٹری ہدایت رکن الدین، مینجمنٹ ایونٹ سکریٹری محمد عثمان ملا، اسپورٹس سکریٹری سلمان وغیرہ موجود تھے۔