ریاض،21؍دسمبر (ایس او نیوز؍ایجنسی)سعودی وزارتِ حج و عمرہ نے سستے اور آسان طریقہئ کار پر مبنی عمرہ ویزا کے نئے طریقے کا اعلان کردیاہے- یہ نیا طریقہ پرسنل وزٹ ویزا کا ہے- اس کے تحت تمام سعودی شہریوں کے لئے ممکن ہے کہ وہ اپنے دوستوں کو مملکت میں عمرہ کرنے کی دعوت دیں - اس کا مقصد دنیا کے مختلف ممالک میں مسلمانوں کو خدا کے مقدس گھر کی زیارت کی سہولیات فراہم کرنا ہے-

سعودی وزارت حج و عمرہ نے”پرسنل وزٹ ویزا“کے ذریعے فراہم کردہ فوائد کی وضاحت کی، یہ ویزا شہریوں کو اپنے دوستوں کو مملکت میں عمرہ کرنے کی دعوت دینے کے قابل بناتا ہے-

اس ویزا کے فوائد کو دیکھیں تو اس میں ایک ہی وقت میں کئی مہمانوں کے لئے ایک سے زیادہ درخواستیں جمع کرانا، کئی مرتبہ یا ایک مرتبہ سعودیہ میں داخل ہونا، عمرہ کے مناسک ادا کرنے کے ساتھ، مسجد نبوی ؐ، مذہبی مقامات اور تاریخی مقامات کا دورہ کرنا اور ساتھ ہی اسی ویزا پر سعودی عرب کے کسی بھی علاقے کی سیر کرنا جیسی سہولیات شامل ہیں - ایک ہی سفر کیلئے اس پرسنل وزٹ ویزا کی معیاد 90دن ہے- ملٹی انٹری ویزا کی معیاد365دن ہے اور اس میں قیام کی مدت90دن ہے-

پرسنل وزٹ ویزا حاصل کرنے کا طریقہ کار:سعودی وزارت خارجہ نے اس سے قبل پرسنل وزٹ ویزاحاصل کرنے کے طریقہ کار کا اعلان کیا تھا جو زائرین کو مملکت کی سرزمین میں داخل ہونے کے قابل بناتا ہے تاکہ وہ اپنے ایسے دوستوں یا جاننے والوں سے ملاقات کر سکیں جو سعودی شہری ہیں - اس سفر میں مملکت کے علاقوں کا دورہ کرنا، عمرہ ادا کرنا، مکہ مکرمہ اور مدینہ منورہ میں مذہبی تاریخی مقامات کا دورہ کرنا اور ثقافتی تقریبات میں شرکت کرنا شامل ہے- وزارت خارجہ نے کہا کہ ویزا کے لئے درخواست ویزا پلیٹ فارم کی ویب سائٹ پر آسان الیکٹرانک اقدامات کے ذریعے دی جائے گی-

انہوں نے وضاحت کی کہ سعودی عرب کے شہری اپنے دوستوں کو سعودی عرب آنے اور عمرہ کرنے کی دعوت وزارت خارجہ میں ویزا پلیٹ فارم پر ذاتی دورے کی درخواست جمع کرا کر اور”وزٹ“کے لئے درخواست کے ذریعے دے سکتے ہیں - متحد قومی رسائی پلیٹ فارم کے ذریعے لاگ ان کریں اور ان لوگوں کا ڈیٹا فراہم کریں جن کو مدعو کیا جانا ہے- ذاتی دورے کی درخواست کرکے اور ضروری اقدامات کی منظوری دے کر آگے بڑھیں - اس کے بعد درخواست پر کارروائی کی جائے گی اور ذاتی وزٹ ویزا دستاویز جاری کی جائے گی جس کا ڈیٹا”دعوت نامہ کی درخواست“انکوائری سروِس کے ذریعے دیکھا جا سکتا ہے-