انکولہ - ہبلی ریلوے لائن منصوبہ : مرکزی حکومت کے وفد نے کیا مختلف مقامات کا معائنہ
کاروار،28؍ ستمبر (ایس او نیوز) ریاستی ہائی کورٹ کے حکم کے مطابق انکولہ - ہبلی ریلوے منصوبے پر عمل پیرائی کے سلسلے میں مثبت اور منفی پہلووں کا جائزہ لینے کے لئے مرکزی حکومت کے ایک وفد نے انکولہ اور یلاپور تعلقہ جات میں مختلف جنگلاتی علاقوں کا معائنہ کیا۔
دہلی، مدھیہ پردیش ، مہاراشٹرا اور کرناٹکا سمیت مختلف ریاستوں کے 40سے زائد ماہرین پر مشتمل مرکزی افسران کی ٹیم انکولہ کے نوگدے، کنچن باگیلو، سنکسال، کوٹے پال، رامن گولی جیسے فوریسٹ علاقوں سے گزرنے والی ریلوے لائن کا خود معائنہ کیا۔ فوریسٹ محکمہ کی رپورٹوں کےمطابق منصوبہ جات علاقوں میں جنگلی جانوروں کو پہنچنےوالےنقصانات اور فائدوں پر گفتگو کی۔ جن علاقوں سے ریلوےلائن گزر رہی ہے ان مقامات کا گوگل جی پی ایس کے ذریعے جانکاری لیتے ہوئے غور کیا کہ متعلقہ علاقےمیں حساس زون سے آنے والے شیر، ہاتھی وغیرہ جانوروں کی حفاظت کے لئے منصوبہ میں خیال رکھا گیا ہے یا نہیں ۔ترمیم شدہ قریب 28کلومیٹر سرنگ لائن والے اس منصوبے میں اگلے 50برسوں کے بعد جنگلی جانوروں کی تعداد میں اضافہ ہوگا یا نہیں اس تعلق سے افسران اور ماہرین کے درمیان گفتگو ہوئی۔
یڈیورپا کی قیادت والی فوریسٹ کمیٹی نے ریلوے لائن منصوبے کو ہری جھنڈی دکھائی تھی ۔ اس سلسلےمیں ہائی کورٹ نے قومی فوریسٹ کمیٹی کو تفصیلی رپورٹ سونپنے کہاتھا۔اسی حکم کے مطابق مرکزی معائنہ ٹیم نے انکولہ اور یلاپور کے فوریسٹ علاقوں سے گزرنے والی ریلوےلائن علاقوں کا معائنہ کیا، اب کمیٹی کی طرف سے ہائی کورٹ کو رپورٹ سونپی جائے گی۔ کمیٹی میں نائب ڈائرکٹر راکیش جاگنیا،نائب ڈائرکٹر راجیند کمار، سائنس دان ڈاکٹر ٹی این منوہر، پروفیسر سوکمار، ڈاکٹر ایچ ایس سنگھ ، دھارواڑ آئی آئی ٹی کے پروفیسر ناگیش ائیر، وسنت ریڈی ، کاروار کے ڈی سی ایف سمیت کئی افسران موجود تھے۔
یلاپور کےمقامات کا معائنہ :دہوں سے دھول چاٹ رہے ہبلی۔ انکولہ ریلوے لائن منصوبہ کئی ایک رکاوٹوں کے بعد اپنے حتمی مرحلے پرپہنچا ہے۔ مرکزی حکومت کی طرف سے تشکیل کردہ کمیٹی ادھورے ہبلی ۔ انکولہ ریلوےلائن منصوبہ کا معائنہ کرنے اور عوام سے جانکاری لینے کے کام میں مصروف ہے۔ اسی کے تحت یلاپور تعلقہ کے جنگلات سے گزرنے والی ریلوےلائن کےمقامات کا بھی دورہ کرتےہوئےکمیٹی ممبران نے معائنہ کیا۔
مرکزی ٹیم نے ارے بائیل گھاٹ علاقہ ، زمین کھسکنے والے علاقے تلیکے بائیلو، باسل کے چٹکےبائیلوجیسےمقامات پر پہنچ کر معائنہ کیا۔ کمیٹی ممبران نے شام تک کسی بھی اخبارنویس سے بات نہیں کی اور اپنے معائنہ کاکام مکمل کیا۔