بھٹکل انجمن حامئی مسلمین کے صد سالہ جشن کی مناسبت سے انجمن پرائمری اسکولی طلبا کے درمیان فیانسی ڈریس مقابلہ جات کا انعقاد
بھٹکل:07؍دسمبر(ایس اؤ نیوز)انجمن حامئی مسلمین بھٹکل کے صدسالہ جشن کی مناسبت سےانجمن کے خدیجہ سید علی کیمپس میں بروز سنیچر 7دسمبر 2019کو انجمن پرائمری اسکولس کے قریب 250 طلبا وطالبات کے درمیان انٹر اسکول فیانسی ڈریس مقابلہ جات کا انعقاد ہوا۔
ڈائس تقریب کا آغاز انجمن الفطرہ اسلامک پری اسکول کے متعلم محمد اقبال چامنڈی کی تلاوت قرآن سے ہوا۔ انجمن تکیہ پرائمری اسکول کی طالبہ خیر النساء نے ہدیہ نعت پیش کی تو انجمن اردو پرائمری اسکول کی طالبات مریم ایفا اور ساتھیوں نے ترانہ انجمن کو گوش گزار کیا۔ انجمن نور پرائمری اسکول کی کوآرڈینیٹر محترمہ اسراء نے استقبال کرتے ہوئے مہمانوں کا تعارف پیش کیا۔
اؤز گروپ آف کمپنیز کی ڈائرکٹر محترمہ عمیمہ بنت عتیق الرحمن منیری نے مہمان خصوصی کی حیثیت سے انجمن ، علم اور ترقی کے متعلق اظہار خیال کرتے ہوئے کہاکہ ہمارے لئے انجمن ہی سب کچھ ہے، کیونکہ یہی ایک تعلیم ادارہ ہے جو ہماری قوم کو تعلیم سے مالامال کررہاہے۔ انہوں نے انجمن کے بانیوں کو یاد کرتےہوئے کہاکہ صدی پہلے جس تعلیمی بیج کو بویا تھا وہ آج ایک شجر سایہ دار بن کر پھل اور پھلوں سے نواز رہاہے جس پر ہمیں ناز ہونا چاہئے۔ انہوں نے والدین و سرپرستوں سے کہاکہ آج جو کچھ ٹکنالوجی کا عروج اور ترقیات ہورہی ہیں وہ سب کچھ علم کی بنیاد پر ہے۔ تو ہمیں علم کے میدان میں آگے بڑھنے کی ضرورت ہے، اس موقع پر انہوں نے یقین دہانی کرائی کہ وہ انجمن اور علمی سطح پر ہمیشہ ہرطرح کی مدد وتعاون کے لئے تیار ہیں۔
انجمن آزاد پرائمری اسکول کی محترمہ فرح نے شکریہ کلمات اداکئے تو محترمہ سمیرہ اور محترمہ رحمت نے نظامت کے فرائض انجام دئیے۔ تقریب میں انجمن صدسالہ جشن زنانہ کمیٹی کی کنونیرمحترمہ سیمہ نذیر احمد قاسمجی ، کوآرڈینیٹر لیڈیز ایونٹس کمیٹی ،انجمن پی یوکالج فارویمن بھٹکل کی شعبہ انگریزی کی لکچرر محترمہ طالعہ معلم ،انجمن پی یوکالج فارویمن بھٹکل کی پرنسپال ڈاکٹر فرزانہ محتشم،محترمہ صادقہ قاضیہ،انجمن کےسبھی پرائمری اسکولوں کی صدرمدرسین آزاد انگلش کی محترمہ شمیم چامنڈی ، انجمن نور کی محترمہ رضمی کوبٹے ، انگلش میڈیم ہائر اور الفطرہ کی محترمہ شہناز جوکاکو ، تکیہ کی رمشا خلیفہ اور اردو پرائمری کی قدسیہ بیگم وغیرہ موجود تھے۔