بھٹکل انجمن ڈگری کالج کے متعلم کرناٹکا یونیورسٹی دھارواڑ کی کبڈی ٹیم کے لئے منتخب : انجمن طلبا کا یونیورسٹی بلیو کا سلسلہ جاری
بھٹکل:07؍دسمبر(ایس اؤ نیوز)انجمن ڈگری کالج بھٹکل کے متعلم گروراج ایم نائک (بی اے ، فسٹ سمسٹر) کرناٹکا یونیورسٹی دھارواڑ کی کبڈی ٹیم کے لئے منتخب ہوتے ہوئے یونیورسٹی بلیو کا خطاب اپنایا ہے۔
انجمن ڈگری کالج اینڈ پی جی سنٹر بھٹکل کے کئی طلبا کھیل کےمختلف میدانوں میں یونیورسٹی بلیو بنتے رہےہیں، اب یونیورسٹی کی سطح پر انجمن کالج بھٹکل کے کھلاڑیوں کی ایک پہچان بن گئی ہے۔ اب بی اے اول میں زیر تعلیم گروراج منجوناتھ نائک نے کبڈی میں بہترین کھیل کا مظاہرہ پیش کرتے ہوئے یونیورسٹی ٹیم کے لئے منتخب ہوئے ہیں۔ گروراج 21اور22ستمبر 2019کو دھارواڑ کے رانی چنما میدان میں منعقدہ انتخابی کیمپ میں شریک ہوئے تھے۔ جہاں کرناٹکا یونیورسٹی سےملحق کالجوں کے قریب 260کبڈی کے کھلاڑیوں نے اپنے مظاہرے کو پیش کیا تھا ان میں سے انجمن کالج کے گروراج کا منتخب ہونا بڑے کارنامے کے طورپر دیکھا جارہاہے۔ گروراج 11سے 14دسمبر 2019تک منگلورو یونیورسٹی میں منعقد ہونے والے آل انڈیا ساؤتھ زون انٹر یونیورسٹی کبڈی مین ٹورنامنٹ میں کرناٹکا یونیورسٹی ٹیم کی طرف سے کھیلیں گے۔گروراج یونیورسٹی بلیو منتخب ہونے پر انجمن حامئی مسلمین بھٹکل کے صدر، جنرل سکریٹری ، ایڈیشنل جنرل سکریٹری ، کالج بورڈ سکریٹری، پرنسپال ، اساتذہ سمیت سبھی نے مبارکباد پیش کی ہے۔