فورلین شاہراہ پر جانوروں کی موجودگی سے حادثات میں اضافہ : کیا مویشی پالن وزیر کی تجویز کارگر ہوگی ؟
کاروار:22؍جنوری (ایس اؤ نیوز)ساحلی پٹی پر قومی شاہراہ کو منتقل کرتےہوئےفورلین کی تعمیر ہورہی ہےتقریباً کام مکمل بھی ہوچکاہے، اس کے باوجود فورلین شاہراہ سواریوں اور مسافروں کی مشکلات میں کوئی کمی نظر نہیں آرہی ہے۔ شاہراہ پر جہاں تہاں کھڑے جانوروں سے بار بار حادثات ہورہےہیں انسانی جانیں تلف ہورہی ہیں اور آوارہ جانوروں کی چوری کو بھی راہ دے رہی ہیں۔ ان سب کے لئے مویشی پالن وزیر پربھو چوہان نے ایک حل پیش کرتےہوئےہر تعلقہ میں دو دو گوشالوں کی شروعات کا تیقن دے کر چلےگئے ہیں اور عوام انتظار میں ہیں کہ کسی طرح حل نکلے۔
اترکنڑا ضلع میں فورلین تعمیر کا کام قریب الختم ہے، جو یقیناً سواریوں کےلئے آسانی ہوگی۔ لیکن ضلع سے گزرنے والی شاہراہ پر نظر دوڑائیں توسواریوں کے لئے کئی ایک مقامات پر جانور درد سر بنے ہوئےہیں۔ شاہراہ کے بیچوں بیچ جانور کھڑے رہنے سے سواریوں کو گزرنے میں کافی دشواری پیش آتی ہے۔
رات کے اوقات میں زیادہ حادثات :دن میں دور سے ہی جانوروں کا پتہ چلتا ہے تو سواراپنی سواریوں کی رفتار میں کمی کرتے ہوئے کسی طرح گزرجاتےہیں۔ لیکن رات کے اوقات میں جانورنظر نہیں آنےکی وجہ سے زیادہ حادثات ہورہےہیں، چھوٹی سواریوں کے ٹکرانے سے جہاں سوار زخمی ہوتےہیں وہیں بڑی سواریوں سے ٹکرانے پر جانور ہلاک ہونے کے واقعات بھی ہوئے ہیں۔ یہی وجوہات ہیں جو سواریوں کے لئے جانور خطرناک ہورہےہیں ، مگر کوئی حل نظرنہیں آرہاہے۔ شاہراہ پر پیش آنے والی مصیبتوں کو جب مویشی پالن وزیر کے سامنے پیش کیاگیا تو انہوں نے ہرتعلقہ میں دو دو گوشالوں کو قائم کرنےکاتیقن دیاہے۔اور امید کی جارہی ہے کہ شاہراہ کی مشکلات کا حل ملنے کے ساتھ ساتھ آوارہ جانوروں سے ہونے والے حادثات میں بھی کمی ہوگی۔
اس سے قبل پولس محکمہ نے شاہراہ سے گزرنے والی سواریو ں کو جانوروں کے حادثات سے تحفظ بخشنے کے لئے جانوروں کو ریفلکٹر بھی لگائے گئے تھے۔ جانوروں کے سینگ، گردن وغیرہ پر ریڈیم ریفلکٹر لگائےجانے سے سواروں کو رات کے اوقات میں پہنچانے میں آسانی ہوتی تھی ۔ مگر کیا کریں ، آوارہ جانورگروپ کی شکل میں ہونے سے پولس محکمہ کا منصوبہ کارگر نہیں ہوپارہاہے۔ اور کچھ لوگ اپنے پالتوجانوروں کو بھی راستے پر چھوڑدینےسے کوئی بھی تجویز حل نہیں ہوپارہی ہے۔ اوراسی وجہ سے ضلع میں جانورچوری کے لئے راہیں آسان ہورہی ہیں۔ اب جب کہ وزیر مویشی پالن نے گوشالوں کے قیام کی بات کہی ہے تو عوام انتظار میں ہیں کہ وہ کب قائم ہونگے اور ہمیں شاہراہ کی مشکلات سے کب چھٹکاراملے گا۔