نئی دہلی،27؍اپریل(ایس او نیوز)اپنی اشتعال انگزیوں، فرقہ وارانہ منافرت پر منبی بیانات اور زہر افشانی کیلئے بدنام کرناٹک سے بی جے پی کے رکن پارلیمنٹ اور سابق مرکزی وزیر اننت کمار ہیگڑے کا اکاؤنٹ ٹویٹر نےبلاک کردیا ہے۔ اس کی اطلاع خود ہیگڑے نے اپنے فیس بک پوسٹ پر دی ہے۔
ہیگڑے کے دعوے کے مطابق انہوں نے خالصتان حامیوں اور تبلیغی جماعت کے حوالے سے کچھ بولڈ ٹویٹ کئے تھے جس کے بعد ان کے اکاؤنٹ کو بند کردیا گیا ہے۔
انہوں نے اس کی شکایت وزیر اعطم نریندر مودی سے کی ہے اور ٹویٹر پر ‘‘اینٹی انڈیا’’ موقف اختیار کرنے کا الزام عائد کیا ہے۔ انہوں نے الزام لگایا کہ ٹویٹر نے جانبداری کا مظاہرہ کرتے ہوئے ان کے اکاؤنٹ کو بند کیا ہے۔انہوں نے اسے ‘‘ڈیجیٹل نو آبادیاتی نظام ’’ سے تعبیر کیا ہے۔
واضح رہے کہ اس سے قبل فلم اداکارہ کنگنا راناوت کی بہن کا ٹویٹر اکاؤنٹ بھی مسلمانوں کے خلاف زیرافشانی کرنے کی وجہ سے بلاک کیا جاچکا ہے۔واضح رہے کہ کسی اکاؤنٹ کے تعلق سے جب بہت سارے لوگ ٹویٹر سے شکایت کرتے ہیں تو ٹویٹر اس پر ایکشن لیتا ہے۔
واضح رہے کہ اننت کمار ہیگڑے اس سے قبل بھی مسلمانوں کیخلاف زیر افشانی کرچکے ہیں۔ ان کی بیان بازی کی وجہ سے اکثربی جے پی کو رسوائی کا سامنا رہتا ہے۔ اس کے باوجود وہ باز نہیں آتے۔ اب ٹویٹر نے بھی ان کے خلاف ایکشن لے لیا ہے جو یہ واضح کرتا ہے کہ ان کے بیانات دو فرقوں میں تقسیم پیدا کرتے ہیں۔