کاروار9؍مارچ (ایس او نیوز) پارلیمانی انتخابات بالکل قریب آ گئے ہیں اور اس پس منظر میں اراکین پارلیمان نے اپنے حلقوں کے لئے جاری کیے گئے فنڈز کا استعمال کس حد تک کیا ہے اور کتنا فنڈ استعمال کیے بغیر یوں ہی بیکار چھوڑ دیا ہے ا س کی تفصیلات عام کی گئی ہیں۔ 

ان اعداد وشمار پر نظر ڈالنے سے پتہ چلتا ہے کہ جن اراکین پارلیمان نے اپنے حلقے کی ترقی کے لئے  مختص فنڈ ز کو پوری طرح استعمال نہیں کیا ان کی فہرست میں کینرا حلقے کے رکن پارلیمان اور موجودہ مرکزی وزیر اننت کمار ہیگڈے کا نمبر ۹ واں ہے۔ موصولہ تفصیلات کے مطابق سولہویں لوک سبھا میعاد 2014-19 کے دوران کینرا حلقے کی ترقی کے لئے جو رقم ایم پی فنڈ کے طور پر جاری کی گئی تھی وہ 15کروڑ روپے تھی۔ اننت کمار ہیگڈے نے اس میں سے11.47کروڑ روپوں کا استعمال کیااور3.75کروڑ روپے بغیر خرچ کیے یوں ہی چھوڑ دئے ہیں۔ اسی طرح سابقہ میعاد میں اننت کمار ہیگڈے نے انہیں ملنے والے فنڈ سے 4.85کروڑ روپے خرچ کیے بغیر چھوڑ دئے تھے۔

بتایاجاتا ہے کہ پارلیمان کی اس میعاد میں تمام اراکین کے لئے جملہ 559.10کروڑ روپوں کا فنڈ مختص کیا گیا تھا۔ اس میں سے کُل 474.32 کروڑروپے اراکین پارلیمان نے اپنے اپنے حلقوں میں خرچ کیے اور جملہ 84.77کروڑ روپے بے مصرف پڑے رہ گئے۔یعنی تمام اراکین پارلیمان نے من جملہ دستیاب فنڈ کا 87.43% حصہ ہی استعمال کیا ہے۔