اومیکرون کے پیش نظر کرناٹک میں نئے سال کی تقریب پرپابندی
بنگلورو،21دسمبر(آئی این ایس انڈیا) ملک میں اومیکرون کے بڑھتے ہوئے معاملات کو دیکھتے ہوئے کرناٹک حکومت نے سخت قوانین نافذکیے ہیں۔ ریاست میں 30 دسمبر سے 2 جنوری تک نیو ایئر پارٹی پر پابندی لگا دی گئی ہے۔ یہ لگاتار دوسرا سال ہے جب لوگ کسی اپارٹمنٹ کمپلیکس میں ہوٹلوں، پبوں اورریستورانوں یا نجی پارٹیوں میں تقریبات کے لیے جمع نہیں ہو سکیں گے۔ریاست کے وزیر اعلیٰ بسواراج بومئی نے کہاہے کہ ریاست میں کورونا کے بڑھتے ہوئے کیسز اور ہماری ٹیکنیکل ایڈوائزری کمیٹی کے ماہرین کی رائے کی بنیاد پر ہم نے فیصلہ کیا ہے کہ نئے سال کو منانے کے لیے ہونے والے تمام پروگراموں پر پابندی عائد کر دی جائے گی۔ ہوٹلوں، پبوں اورریستورانوں میں ڈی جے بلا کر رقص کرنے پر بھی پابندی عائد کر دی گئی ہے۔ انہوں نے کہاہے کہ تمام ریستوران، ہوٹل اور پب 50 فی صدگنجائش کے ساتھ کام کر سکیں گے اورصرف ان ملازمین کو کام کرنے کی اجازت ہو گی جنہیں ویکسین کی دونوں خوراکیں مل چکی ہیں۔