بنگلورو،19؍مارچ (ایس او نیوز) بروز چہارشنبہ بتاریخ 22 رجب المرجب 1441 مطابق 18 مارچ 2020 امیر شریعت کرنا ٹک حضرت مولانا صغیراحمد صاحب رشادی دامت برکاتہم مہتمم شیخ الحدیث دارالعلوم سبیل الرشاد بنگلور کی صدارت میں کورونا وائرس کی وبا سے متعلق امارت شرعیہ کرناٹک کا علمائے عظام، ائمہ کرام، ڈاکٹرس اور عمائدین شہر پرمشتمل ایک اہم اجلاس منعقد ہوا، جس میں امیر شریعت نے کہاکہ اس وائرس کی وبا سے بچنے کے لئے جہاں احتیاطی تدابیر ازحد ضروری ہیں، وہیں رجوع الی اللہ اور توبہ واستغفار کی ضرورت ہے، ان حالات میں لوگوں کو بدحواس اور خوف زدہ ہونے کی ضرورت نہیں۔ اس وبائی مرض کے خلاف جنگ اکیلے حکومت یا کوئی ادارہ نہیں سکتا۔ اس میں تمام شہریوں کو اپنی ذمہ داری ادا کرنی چاہئے۔ نیز ملکی اورملی مسائل میں ملت اسلامیہ ہند کو چاہئے کہ اپنا مؤثر رول نبھا ئیں۔ اس اجلاس میں باتفاق رائے مندرجہ ذیل امور طے پائے۔

(1)ذمہ داران مساجد اور خطبائے کرام سے گذارش کی جاتی ہے کہ آنے والے تین جمعہ تک جمعہ کے سارے اعمال (جمعہ کا خطبہ اور نماز وغیرہ) صرف 15 منٹ میں مکمل کر لیں اور خطبہ نماز کے لئے باہر کے مائک کا استعمال نہ کریں۔

(2) مساجد میں پا کی صفائی کا خوب اہتمام ہو، خاص طور پر چٹائی، کار پیٹ، قالین وغیرہ پر توجہ دیں۔

(3) مساجد کے بیت الخلاء استنجا خانے، نالیاں وغیرہ دن میں ایک سے زیادہ مرتبہ صاف کرائیں۔

(4)مصلیوں کو ہدایت دی کہ گھر سے وضو بنا کر اپنی ٹوپی پہن کر آ ئیں۔

(5) عموی تولیہ اور ٹوپیاں مسجدوں سے ہٹادیں۔

(6) سنن ونوافل گھروں میں پڑھنے کا اہتمام کریں۔

(7) جن لوگوں میں اس وبائی بیماری کی علامات پائی جارہی ہیں ان کے لئے بہتر ہے کہ اپنے گھروں میں نماز ادا کریں۔ اللہ ان حضرات کو شفاء عطافرمائے۔