ویراج پیٹ، 24؍فروری(ایس او  نیوز)کرناٹک کے کورگ ضلع کے ویراج پیٹ کے ساکن ہندوستانی فوجی الطاف احمد(37سال)  جموں و کشمیر میں ملک کی سرحدوں کی حفاظت پر مامور رہتے ہوئے چہارشنبہ کے روز برف کا تودہ کھسکنے کی وجہ سے شہید ہو گئے-ویراج پیٹ کی سینٹ آنس کالج میں ابتدائی تعلیم اور ٹاؤن کی سرکاری ڈگری کالج میں پی یو سی مکمل کرنے کے بعد الطاف نے فوج کی بھرتی کی ریلی میں حصہ لیا اور منتخب ہوئے تھے- ویراج پیٹ میں مرحوم عمر صاحب اور عائشہ کے فرزند الطاف کے پسماندگان میں ان کی بیوہ، ایک فرزند اور ایک دختر شامل ہیں -

بتایا جاتا ہے کہ الطاف کی میت سری نگر سے جمعہ کے روز ویراج پیٹ لائی جائے گی اور فوجی وسرکاری اعزازات کے ساتھ ان کی تدفین عمل میں آئے گی- مرنے سے چند دن پہلے ہی الطاف نے سرحد سے ایک آڈیو روانہ کیا تھا جس میں انہوں نے ریاست کے بگڑتے حالات اور حجاب کو لے کر پیدا ہونے والے تنازع پر تشویش کا اظہار کرتے ہوئے ملک کے باشندو ں سے کہا تھا کہ ملک کی فکر کریں - ملک کو بچانے کیلئے نہ جانے کتنے فوجی اپنی جان دے رہے ہیں -ایسے میں عوام آپس میں حجاب اور زعفرانی شال کو لے کر لڑائی نہ کریں - الطاف نے کہا تھا کہ جس طرح کے حالات پیدا ہوئے ہیں انہیں دیکھ کر کافی دکھ ہو تا ہے - الطاف کا یہ آڈیو سوشیل میڈیا پر کافی وائرل ہوا تھا - اس کے چند ہی دن بعد ان کے مرنے کی خبرآئی-