دہلی: عام آدمی پارٹی کو اب بھی کانگریس سے اتحاد کی امید، پرچہ نامزدگی موخر
نئی دہلی ،19؍اپریل (ایس او نیوز؍آئی این ایس انڈیا)عام آدمی پارٹی اور کانگریس کے درمیان اتحاد کا امکان اب بھی برقرار ہے۔یہی وجہ ہے کہ’آپ‘نے اپنے تین امیدواروں کی پرچہ نامزدگی کا عمل 22 اپریل تک ملتوی کردیا ہے۔آتشی، پنکج گپتا اور گگن سنگھ کی پرچہ نامزدگی اب 20 اپریل کے بجائے 22 اپریل کو ہوگی ۔اس کے علاوہ باقی تین امیدوار بھی پیر کو پرچہ نامزدگی داخل کریں گے۔عام آدمی پارٹی کے سینئر لیڈر گوپال رائے نے کہا ہے کہ اتحاد پر کانگریس کو فیصلہ لینے کے لئے وقت دینے کے لئے نامزدگی کا عمل موخر کیا گیا ہے۔آپ نے ہریانہ میں کانگریس کو اتحاد کے لئے 7,2,1کا فارمولا دیا ہے۔ہفتہ کو عام آدمی پارٹی کے مشرقی دہلی، شمال ومشرقی دہلی اور شمال ومغربی دہلی کے امیدواروں کو پرچہ نامزدگی داخل کرنا تھا۔لیکن اب تمام باقی 6 امیدوار پیر کو پرچہ نامزدگی داخل کریں گے۔مغربی دہلی کے امیدوار نے جمعرات کو اپنا پرچہ نامزدگی داخل کر دی ہے۔ جمعرات کو مغربی دہلی لوک سبھا علاقے سے عام آدمی پارٹی نے اپنے امیدواروں کے لوک سبھا انتخابات کے لئے پرچہ نامزدگی کی شروعات کی۔عام آدمی پارٹی کے مغربی دہلی سے لوک سبھا امیدوار بلبیر سنگھ جاکھڑ نے انتخابات کے لئے اپناپرچہ نامزدگی داخل کیا۔پارٹی کے سینئر رہنماؤں سمیت آپ کے سینکڑوں کارکن نامزدگی پروگرام میں شامل ہوئے۔آئندہ 12 مئی کو دہلی کی سات لوک سبھا سیٹوں پر ووٹنگ ہونی ہے۔عام آدمی پارٹی اپنے سات امیدوار دہلی کے انتخابی مہم میں اتارنے کا اعلان کر چکی ہے۔