گلبرگہ،29؍اگست(ایس او نیوز) ڈپٹی کمشنر گلبرگہ وی وی جیوتسنانے جمعہ کے دن ایک صحافتی کانفرنس سے خطاب کرتے ہوئے کہا کہ سٹی میونسل کارپوریشن گلبرگہ کے انتخابات کے لئے تمام تیاریاں مکمل کرلی گئی ہیں۔ جمعرات کے دن انتخابی امیدواروں کی قطعی فہرست جاری کردی گئی تھی جس کے مطابق 300امیدوار انتخابی میدان میں ہیں اور گلبرگہ شہر کے55وارڈس میں رائے دہی کی نگرانی کے لئے 2750 افسران کو ڈیوٹی پر متعین کردیا گیا ہے۔
اس بار 83امیدوار آزاد امیدوار کی حیثیت سے انتخاب لڑ رہے ہیں۔ کانگریس نے تمام 55وارڈس میں اپنے امیدوار کھڑاکئے ہیں جبکہ بی جے پی 47وارڈس اور جنتا دل سیکولر نے 45وارڈس میں اپنے امیدوار کھڑا کئے ہیں۔عام آدمی پارٹی 26نشستوں کے لئے مقابلہ کررہی ہے۔ جبکہ آل انڈیامجلس اتحاد المسلمین نے 20وارڈس میں اپنے امیدوار کھڑا کئے ہیں۔ دیگر جماعتوں میں سوشل ڈیموکریٹک پارٹی آف آنڈیا SDPI نے 10وارڈس میں، بہو جن سماج پارٹی نے 6نشستوں پر، کرناٹک راشٹریہ سمیتی نے 4پراور کمیونسٹ پارٹی آف انڈیا نے 2نشستوں پر اپنے امیدوار کھڑا کئے ہیں ویلفیر پارٹی آف انڈیا نے صرف ایک وارڈمیں اور انڈین یونین مسلم لیگ بھی صرف ایک وارڈ میں اپناامیدوار کھڑا کیا۔ وارڈ نمبر 17میں جملہ 15امیدوار انتخاب لڑ رہے ہیں جب کہ ان میں سے 10آزاد امیدوار ہیں۔اسی طرح وارڈنمبر 18سے 11امیدوار انتخاب لڑ رہے ہیں جب کہ وارڈ نمبر 19سے 10اور وارڈ نمبر 40سے بھی 10امیدوار انتخاب لڑ رہے ہیں۔
مسرز جیوتسنا نے کہا کہ الیکشن کے لئے تمام تیاریاں مکمل کرلی گئی ہیں۔ 3ستمبر کو رائے دہی صبح 7بجے سے شام 6بجے تک جاری رہے گی۔27سیکٹر آفیسرس مقرر کئے گئے ہیں اور محکمہ داخلہ سے درخواست کی گئی ہے کہ انھیں مجسٹیرئیل اختیارات دئے جائیں۔ ووٹوں کی گنتی نوتن ودیالیہ پری یونیورسٹی کالج کیمپس ، گلبرگہ میں 6ستمبر کو ہوگی۔ مرد ووٹروں کی جملہ تعداد 2,58,755اور خواتین رائے دہندوں کی جملہ تعداد 2,60,543ہے جب کہ 146زنخوں کے بشمول ووٹرس کی جملہ تعداد 5,19,464ہے۔