نئی دہلی،20/جون (ایس او نیوز/ آئی این ایس انڈیا) وزیر اعظم نریندر مودی نے لوک سبھا اور اسمبلی انتخابات ایک ساتھ کرائے جانے (ایک ملک ایک انتخاب) پر جو کل جماعتی میٹنگ بلائی تھی  وہ ختم ہو گئی ہے۔ وزیر اعظم نریندر مودی کے ساتھ کئی سیاسی جماعتوں کے رہنماؤں نے اس میٹنگ میں حصہ لیا تھا۔

میٹنگ میں بابائے قوم مہاتما گاندھی کی 150 ویں یوم پیدائش کے انعقاد سمیت پانچ اہم مسائل پرتبادلہ خیال کیا گیا۔بتایا گیا ہے کہ  میٹنگ میں ایک کل جماعتی کمیٹی بنانے کا فیصلہ کیا گیا ہے۔ راج ناتھ سنگھ نے اخبارنویسوں کو بتایا کہ  تمام پارٹیوں کے صدر کو مدعو کیا گیا تھا اور اجلاس کے پانچ ایجنڈے تھے۔ اس میں سے " ایک ملک ایک انتخاب" پر زیادہ تر نے رضامندی دی ہے،تاہم کچھ نے پوچھا کہ یہ کس طرح ہو گا؟ طے کیا گیا ہے کہ اس کے لئے کمیٹی بنائی جائے۔

اس کے علاوہ مہاتما گاندھی کی 150 ویں یوم پیدائش،  اضلاع کی ترقی  اور  پانی کا انتظام پر بھی بات چیت کی گئی۔ راج ناتھ سنگھ نے بتایا کہ پانی کا انتظام  ایک بڑا چیلنج ہے جس کے لئے پانی کا تحفظ ہی ایک راستہ ہے۔ پانی کے تحفظ کے لیے تحریک کو آگے بڑھانا ہے۔ راج ناتھ سنگھ نے کہا کہ یہ سارے ایجنڈے حکومت کے ایجنڈے نہیں ہیں بلکہ ملک کے ایجنڈے ہیں۔ میٹنگ میں  اسد الدین اویسی پہنچے ، سی پی آئی کے سیتا رام یچوری اور سدھاکر ریڈی کے ساتھ ڈی راجہ بھی شریک ہوئے۔ جموں و کشمیر کے سابق وزیر اعلی محبوبہ مفتی بھی میٹنگ میں حصہ لیا۔پی ایم کی طرف سے بلائی گئی میٹنگ میں بہار کے وزیر اعلی نتیش کمار اور نوین پٹنائک نے بھی شرکت کی۔