بیتیا،17/ستمبر(ایس او نیوز/ آئی این ایس انڈیا) مظفر پور شیلٹر ہوم میں رہ چکی ایک لڑکی سے گینگ ریپ کے معاملے میں تمام ملزمان کو گرفتار کر لیا گیا ہے۔اے ڈی جی پی جیتیدر کمار نے یہ معلومات دی۔بہار کے بیتیا میں جمعہ کو ایک چلتی گاڑی میں لڑکی کے ساتھ گینگ ریپ کیا گیا تھا۔اس معاملے میں پولیس نے چار لوگوں کے خلاف ایف آئی آر درج کیا تھا۔لڑکی کے ساتھ ملزمان نے پہلے گینگ ریپ کیا پھر اسے گاؤں کے قریب چھوڑ کر فرار ہو گئے تھے۔اے ڈی جی پی نے کہاکہ گرفتار لوگوں کے بیان کی بنیاد پر ایک شخص کا نام سامنے آیا ہے۔اس کی گرفتاری کے لئے ایک خصوصی ٹیم تلاش کر رہی ہے۔انہوں نے یہ بھی کہاکہ تحقیقات کے دوران یہ پتہ چلا ہے کہ ملزم اور متاثرہ ایک دوسرے کو جانتے تھے میڈکل رپورٹ کے مطابق لڑکی نابالغ ہے۔اس کی عمر 15 سے 17 سال کے درمیان ہے۔اس معاملے میں چار لوگوں پر الزام لگا تھا۔ان میں سے تین کوکل گرفتار کیا گیا تھا اور ایک کو آج گرفتار کیا گیا۔بتا دیں کہ لڑکی مظفر پور کے اسی شیلٹر ہوم میں رہتی تھی جس میں 30 سے زیادہ لڑکیوں کے ساتھ ریپ ہوا تھا۔یہ معاملہ اس وقت سامنے آیا تھا جب ٹاٹا انسٹٹیوٹ آف سوشل سائنسز(ٹی آئی ایس ایس) نے ایک سوشل آڈٹ کیا تھا۔اس معاملے کے سامنے آنے کے بعد ریاستی حکومت نے گزشتہ سال اسے سی بی آئی کو سونپ دیا تھا۔ادھر اس گینگ ریپ کے معاملے کی تحقیقات کے لئے قومی خواتین کمیشن نے پیر کو ایک کمیٹی قائم کی۔قومی خواتین کمیشن کی صدر ریکھا شرما کی قیادت والی کمیٹی اس ہفتے بعد بہار کا دورہ کرے گی اور متاثرہ، ڈی جی پی اور بہار کے وزیر اعلی نتیش کمار سے ملاقات کرے گی۔قومی خواتین کمیشن کی صدر ریکھا شرما نے کہا تھاکہ بہار سے ہمارے رکن باقاعدہ دورہ کرتے ہیں اور انہوں نے خواتین کے خلاف بڑھتے ہوئے جرائم کے مقدمات کو اٹھایا ہے لیکن حالات بہتر ہوتے دکھائی نہیں دے رہے ہیں۔ میں تمام معاملات پر خود بہار کے ڈی جی پی اور ممکن ہوا تو بہار کے وزیر اعلی کے ساتھ بھی بات کروں گی۔